Қазақстанда алғаш рет дрондармен әскери жарыс ұйымдастырылды

Тараз қаласында Өңірлік қолбасшылық «Оңтүстік» әскерилері арасында дрондарды басқару және ұрысқа жақын жағдайларда пилотаж шеберлігін көрсетуге арналған ерекше сайыс өтті. Бұл жөнінде Kazinform хабарлады.

Жарыс барысында әскери қызметшілер жоғары жылдамдықпен маневр жасап, дрондарды тар өткелдерден өткізді әрі бейнені нақты уақыт режимінде командалық пунктке жеткізді. Ең қиын тапсырмалардың бірі – 10 метрден жоғары биіктіктен көлемі әскери техниканың люгіне тең нысанаға граната тастау болды.

Әскерилердің айтуынша, қазіргі заманда ұшқышсыз ұшу аппараттарының (БПЛА) маңызы ерекше. Олар барлау жүргізу, жоғары дәлдіктегі соққы жасау, жедел жүк жеткізу секілді түрлі мақсатта кеңінен қолданылады.

Өткен жылы «Оңтүстік» қолбасшылығы құрамында арнайы ұшқышсыз авиациялық жүйелер қызметі құрылған болатын. Сол уақыттан бері дрондарды әскери бөлімдердің күнделікті қызметіне енгізу жұмыстары белсенді жүргізілуде.

"Дрондар мотожаяу әскерлерде де, инженерлік-саперлік бөлімшелерде де, байланысшылар мен механикаландырылған құрамаларда да қажет. Қолдану ауқымы шексіз. Біз олардың мүмкіндіктерін дамытуға, соның ішінде FPV түрін жетілдіруге басымдық беріп отырмыз", – деді подполковник Роман Қожахметов.

Сайыс қорытындысы бойынша үздік операторлар:

• ефрейтор Ұлан Сүйдуов (12740 әскери бөлімі, Сарыөзек гарнизоны),

• ефрейтор Шыңғысхан Сейдахметов (66567 әскери бөлімі, Қызылорда гарнизоны),

• сержант Мұхаметжан Қырғызәлі (5-механизацияланған бригада, Тараз).

Жалпыкомандалық есепте бірінші орынды Жаркент гарнизонының 74261 әскери бөлімінің командасы иеленіп, қолбасшының ауыспалы кубогын жеңіп алды. Жүлдені команда капитаны, аға лейтенант Расул Мұналбаевқа өңірлік қолбасшы табыс етті.

Жамбылдық әскери қызметшілердің айтуынша, құрлық әскерлерінің өңірлік қолбасшылықтары арасында мұндай жарысты алғаш болып «Оңтүстік» ұйымдастырды.