Қазақстанда алғаш рет жасөспірімге жүрек трансплантациясы жасалды

27 наурыздан 28 наурызға қараған түні Қазақстан медицинасының тарихында тұңғыш рет жасөспірім балаға жүрек ауыстыру отасы сәтті жасалды. Бұл оқиға елімізде балалар трансплантологиясын жүйелі дамытудың жаңа кезеңіне жол ашты, деп хабарлайды heartcenter.umc.

Ота жасалған 15 жастағы пациент 10 жасынан бастап жүректің ауыр дертіне шалдыққан. Донор ретінде бас миының өлімі тіркелген 43 жастағы ер адам танылды. Марқұмның туыстары диагноз расталғаннан кейін ағзаларды қайтыс болғаннан кейінгі донорлыққа беруге ресми келісімдерін берген. Осы ізгі шешім мен трансплантациялық бригаданың үйлесімді жұмысының арқасында жасөспірімге екінші өмір сыйланды. Қазіргі уақытта пациенттің жағдайы қанағаттанарлық, ол жансақтау бөлімінен тиісті отадан кейінгі бөлімшеге ауыстырылды.

Денсаулық сақтау министрі Ақмарал Әлназарова отадан кейін пациент пен оның анасына арнайы барып, баланың жағдайын білді. Министр отбасына қолдау көрсетіп, жоғары технологиялық отаны жүзеге асырған медициналық ұжымға алғыс айтты.

Бүгінгі таңда Қазақстанда әртүрлі ағзаларды ауыстыру бойынша күту парағында (лист ожидания) 123 кәмелетке толмаған бала тұр, оның ішінде 9 бала жүрек трансплантациясына мұқтаж.

Балаларға жүрек трансплантациясын жасау әлемнің санаулы елдерінде ғана жүзеге асырылады (бұл оталардың 80%-ы АҚШ клиникаларының еншісінде). Қазақстанда мұндай күрделі отаның сәтті өтуі еліміздің медициналық инфрақұрылымы мен мамандарының жоғары технологиялық көмек көрсетуге дайын екенін дәлелдейді.