Қазақстанда 16 жасқа толмаған балаларға әлеуметтік желі қолдануға тыйым салынуы мүмкін

Қазақстанда жасөспірімдердің қауіпсіздігін қамтамасыз ету мақсатында әлеуметтік желілерде тіркелу ережелері түбегейлі өзгеруі ықтимал. Мәдениет және ақпарат министрлігі 16 жасқа толмаған азаматтардың онлайн-платформаларда аккаунт ашуына ресми түрде тыйым салу мәселесін қарастырып жатыр.

Бұл туралы Үкімет отырысында Премьер-министрдің орынбасары – Мәдениет және ақпарат министрі Аида Балаева мәлімдеді. Оның айтуынша, министрлік тарапынан онлайн-платформалар мен бұқаралық ақпарат құралдарының қызметін реттейтін арнайы заң жобалары әзірленген. Бұл құжаттарда балалар мен жасөспірімдердің әлеуметтік желілерге кіруін шектеу және белгілі бір жасқа толмағандарға тіркелуге тікелей тыйым салу тетіктері көзделген.

Қазіргі уақытта заң жобалары сарапшылық талқылаудан өтіп, қоғамдық талқылауға ұсынылды. Жаңа ережелерді жүзеге асыру үшін пайдаланушылардың нақты жасын анықтайтын арнайы тексеру тетіктері (верификация) енгізілмек. Сондай-ақ, талаптарды бұзған платформалар мен тұлғалар үшін жауапкершілік шаралары да айқындалады.

Билік бұл қадам балаларды жат ағымдардан, кибербуллингтен және интернеттегі зиянды контенттен қорғау үшін қажет деп есептейді.