Қазақстан жерін жылқы жұты жайлап өтті

Еліміздің бірқатар өңірінде ауа райының қолайсыздығынан жайылымдарды көктайғақ басып, малдың қырылуы байқалды, деп хабарлайды qrnews.kz тілшісі World of NAN-ға сілтеме жасап.

Ең көп Ақмола облысының тұрғындары зардап шекті. Онда қыста 117 жылқы өлген. Жергілікті атқарушы органдардың мәліметінше, мал ақпан айының ортасындағы қатты аяз кезінде қырылған. Көп қырылған – 2023 жылы туған құлындар және әлсіреген кәрі жылқылар болды.

Осындай жағдай Ұлытау облысында да орын алды. Өңірде 67 бас малдың қырылуы тіркелді. Оның үстіне Ауыл шаруашылығы министрлігінің өкілдері өңірді аралап, өлген ірі қара мен олардың иесін анықтау мүмкін болмай отырғанын атап өтті.

Мал өлімі туралы ақпарат басқа өңірлерден де келіп жатыр, бірақ әзірге қыстан аман шықпаған малдың нақты саны белгісіз. Ал мал одан әрі қырылып қалмас үшін иелері оларды қораға ауыстырған.