Қазақстан жарты жылға жұмыртқа импортына тыйым салды

Ауыл шаруашылығы министрінің 2025 жылғы 4 сәуірдегі бұйрығына сәйкес, 9 сәуірден бастап Қазақстанға үшінші елдерден және Еуразиялық экономикалық одақ елдерінен барлық көлік түрімен тауық жұмыртқасын әкелуге алты ай мерзімге тыйым салынады. Бұл туралы министрліктің баспасөз қызметі хабарлады.

Министрлік мәліметінше, тыйым Қазақстан аумағы арқылы транзитпен өтетін жұмыртқаларға, сондай-ақ ЕАЭО-ның бір мүшесінен екінші мүшесіне Қазақстан арқылы тасымалданатын өнімге қатысты қолданылмайды.

Бұл уақытша шара көктем-жаз мезгілінде отандық тауар өндірушілерді қолдау мақсатында енгізіліп отыр. Себебі дәл осы кезеңде жұмыртқаға деген сұраныс азаяды, нарықтың қажеттілігін өндірістік фабрикалар мен жеке шаруашылықтар толықтай қамтамасыз ете алады.

«Бұл фактор құс фабрикаларының жұмысына кері әсер етеді. Жұмыртқа бағасы төмендейді, ал бағаның өзіндік құннан да төмен түсуі кәсіпорындардың рентабельділігіне нұқсан келтіреді», – деп атап өтті министрлік.

Сондай-ақ көктем-жаз мезгілінде жұмыртқаның сақтау мерзімі қысқарады, алайда өндіріс көлемі технологиялық себептерге байланысты азаймайды. Бұл қоймаларда өнімнің жиналып қалуына әкеліп соғады.