Қазақстан жалған құжат рәсімдеген ресейліктерді елден шығаруы мүмкін

Бірқатар шетелдік БАҚ Қазақстанда жалған ықтиярхат алуға қатысты қылмыстық іс тергеліп жатқанын хабарлады. Мәліметтерге сәйкес, бұл іс бойынша Ресей азаматтары да тексерілуі мүмкін. Бұл жөнінде Азаттық радиосы жазды. 

«Слово защиты» және Ресейден соғысқа байланысты Қазақстанға келген азаматтарға көмектесетін құқық қорғаушыларға сүйенген дереккөздердің жазуынша, тергеуді Қазақстанның Ұлттық қауіпсіздік комитеті жүргізіп жатыр. «Новая газета Европа» басылымының мәліметінше, бұл іс бойынша әскерге шақырылатын жастағы ондаған ресейлік куәгер ретінде жауап берген.

Хабарларға қарағанда, тергеу ақпан айының соңында басталған. Әр шақырту кезінде 3–4 адамнан сұрақ алынып жатыр. Құқық қорғаушылардың пікірінше, тергеу нәтижесінде жалған құжатпен ықтиярхат алған ресейліктердің рұқсаттары жойылып, елден шығарылуы мүмкін.

«Ковчег» жобасына жүгінген кейбір ресейліктер көші-қон құжаттарын алаяқтар арқылы рәсімдегенін айтқан. Дегенмен оларға қылмыстық жаза қолданылмайды, тек рұқсат құжаттарының күші жойылуы ықтимал. Егер азамат Қазақстанда бір жылдан астам уақыт заңсыз тұрған болса, ол елден шығарылуы мүмкін.

Қазақстан ҰҚК бұл ақпаратқа әзірге ресми түсініктеме берген жоқ. Ал Сыртқы істер министрінің бірінші орынбасары Ержан Ашықбаев «жаппай депортация» туралы мәліметтерді «сыбыс» деп атады.

Оның айтуынша, Қазақстанға пана іздеп келген шетел азаматтарының өтініштері заң талаптарына сәйкес қаралады. Ал Ресей азаматтарын елден шығару мәселесі тек заңды рәсімдер толық орындалғаннан кейін ғана қаралуы мүмкін.

Ашықбаевтың сөзінше, Ресейге қайтарылуы ықтимал азаматтардың нақты саны белгісіз. Бұған дейін Еңбек және халықты әлеуметтік қорғау министрлігі Қазақстанда 176 адам босқын мәртебесін сұрап отырғанын хабарлаған, алайда олардың қай ел азаматтары екені нақтыланбаған.