Үш күннен бір күнге дейін: Қазақстан ҰҚШҰ әскерін шұғыл кіргізу туралы хаттаманы бекітті

Қазақстан Республикасының Президенті Қасым-Жомарт Тоқаев осы аптада Ұжымдық қауіпсіздік туралы шарт ұйымының (ҰҚШҰ) әскерін кіргізуді және тасымалдауды жеңілдететін хаттамаларды ратификациялау туралы заңға қол қойды.

Құжаттағы ең маңызды өзгеріс – дағдарыс жағдайында одақ әскерін бір елден екінші елге шұғыл тасымалдауды талап ететін кездегі бюрократиялық процедураларды азайту. Жаңа заңға сәйкес, әскерді тасымалдау мерзімі үш күннен бір күнге дейін қысқарады. Сонымен қатар түзетулер транзит, әуежайды техникалық қолдау, аэронавигациялық қызмет және аэронавигациялық деректер сияқты маңызды техникалық ұғымдарды ресми түрде бекітеді.

Ұжымдық қауіпсіздік кеңесінің шешімі бойынша тасымалдау кезінде қабылдаушы немесе транзиттік тарап ұшақтардың келуі мен кетуін, олардың тұрағын, қауіпсіздігін және аэронавигациялық қызметтерді тегін ұсынуға міндетті. Дегенмен жанармай материалдары мен арнайы сұйықтықтарды беру бұл міндеттемелерге кірмейді және өзге келісімдермен реттеледі. Аталған хаттамаға Қазақстан, Беларусь, Қырғызстан, Ресей және Тәжікстан басшылары 2024 жылдың қараша айында қол қойған болатын.

Еске сала кетейік, 2022 жылы Қазақстанда Қаңтар оқиғасы болған кезде Президент Қасым-Жомарт Тоқаев елге «шетелде дайындықтан өткен мыңдаған террорист шабуылдады» деп мәлімдеп, ҰҚШҰ-дан көмек сұраған еді. Осылайша, ұйым тарихында ҰҚШҰ әскері алғаш рет басқа елдің аумағына кіргізілген болатын.