«Қазақстан Украинадағы қақтығысты реттеу жөніндегі келіссөздердің жандануын қолдайды» – Тоқаев

Мемлекет басшысы Қасым-Жомарт Тоқаев Халықаралық бейбітшілік және сенім жылына, Халықаралық бейтараптық күні мен Түрікменстанның тұрақты бейтараптығының 30 жылдығына арналған форумға қатысты.

Форум барысында Президент қазіргі геосаяси жағдайда бейбітшілік пен сенім құндылықтарының ерекше маңызға ие екенін атап өтті. Оның айтуынша, әлемдегі тұрақтылықты сақтау үшін БҰҰ-ға мүше мемлекеттер арасында ашық диалог орнату және ірі державалардың саяси ерік-жігер көрсетуі қажет.

«Қазірдің өзінде жаһан жік-жікке бөлінуден, тіпті ядролық соғыстан бас тартып, бейбітшілік, сенім, ынтымақ секілді құндылықтарды басшылыққа алған кезде әлемде әділетті және орнықты тәртіп орнатуға болатыны белгілі болды», – деді Қасым-Жомарт Тоқаев.

Президент Қазақстанның Украинадағы қақтығысты бейбіт жолмен реттеуге бағытталған келіссөздердің жандануын қолдайтынын айтты.

«Ресей мен АҚШ президенттерінің Анкоридждегі кездесуінен кейін бейбітшілік пактісінің негізгі ережелері белсенді талқылана бастады. Бұл көптен күткен бітімге келу мүмкіндігін жақындатты», – деді Мемлекет басшысы.

Сонымен қатар Қасым-Жомарт Тоқаев Түрікменстан Президентінің БҰҰ бейбітшілік және бейтараптық университетін ашу жөніндегі ұсынысын қолдайтынын жеткізді.

Президенттің айтуынша, бейбітшілікті, сенімді және өзара түсіністі нығайту – аймақтық әрі жаһандық тұрақтылықтың басты кепілі.