Қазақстан Түркияның зілзаладан зардап шеккен аймағында мектеп құрылысын бастады

2023 жылғы 6 ақпандағы жойқын зілзаладан қатты зардап шеккен Газиантеп провинциясында Қазақстан қаржыландыратын мектептің құрылысы басталды. 19 желтоқсан күні Нурдағы қаласында Қазақстанның халықаралық даму агенттігі KazAID ұйымдастырған мектеп іргетасының қалану рәсімі өтті.

Рәсімге Қазақстанның Түркиядағы елшісі Еркебұлан Сәпиев, провинция губернаторы Кемал Чебер, Түркия Сыртқы істер және Білім министрліктерінің өкілдері, сондай-ақ KazAID агенттігінің өкілдері қатысты.

Осыған дейін Түркия президенті Реджеп Тайып Ердоған Қазақстанның қолдауына алғыс білдіріп, бұл жобаның түрік-қазақ бауырластығын нығайтудағы маңызын атап өткен еді.

"Бұл мектеп болашақ ұрпақ үшін түрік-қазақ бауырластығының бір символына айналарына сенімдімін. Қазақстан маңызды қадамдар жасады, ал бұл құрылыс соның жарқын дәлелі", — деді Ердоған.

Қазіргі таңда шұңқыр қазу мен құрылыс ресурстарын жұмылдыру бойынша дайындық жұмыстары аяқталды.