Қазақстан театрлары 2025-2026 жылғы маусымда 2,8 миллионнан астам көрерменді жинады

2025-2026 жылғы театр маусымы еліміздің мәдени өмірі үшін айтулы жетістіктерге толы болды. ҚР Мәдениет және ақпарат министрлігінің мәліметінше, аталған кезеңде отандық театрлар 16 мыңнан астам спектакль қойып, көрерменге 410 жаңа туынды ұсынды. Маусым қорытындысы бойынша театр өнерін тамашалаған көрермендер саны 2 832 835 адамға жетті.

Биылғы маусым театр репертуарының жанрлық жағынан байып, мазмұндық жағынан тереңдеуімен ерекшеленді. Көрермендер қауымы «Астана Опера» сахнасындағы «Қыпшақ қызы Аппақ» операсын, Абай атындағы Қазақ ұлттық опера және балет театрындағы «Ұлы Жібек жолы» балетін, «Астана Балет» театрындағы «Кармина Бурана» балет-кантатасын, сондай-ақ Қ. Қуанышбаев атындағы Қазақ ұлттық музыкалық драма театрындағы Әбіш Кекілбаевтың «Күй» драмасы мен М. Лермонтов атындағы Ұлттық орыс драма театрындағы «Господа Головлевы» спектаклін жоғары бағалады.

Театр ұжымдарының гастрольдік қызметі де қарқынды жүргізілді. Маусым ішінде 539 гастрольдік сапар ұйымдастырылып, өнерпаздар 191 халықаралық және республикалық фестивальде бақ сынады.

Халықаралық аренадағы жетістіктер де көңіл қуантады. Мәселен, Ғабит Мүсірепов атындағы Қазақ мемлекеттік академиялық балалар мен жасөспірімдер театры Бішкекте өткен «ART-ORDO» фестивалінде «Ұлпан» спектаклімен Гран-приді иеленіп, төрт бірдей аталым бойынша топ жарды. Сондай-ақ, «Астана Опера» театрының «El Voice» вокал тобы Ставропольдегі «Солдатский конверт» байқауында бас жүлдені қанжығасына байласа, скрипкашы Бағдат Әбілханов Қытайдағы GRAND ART EXPRESS-CHINA халықаралық байқауында І орынға ие болды.