Қазақстан Таяу Шығыс үстінен ұшуға тыйым салды: Қай рейстер тоқтатылды?

Қазақстанның Авиациялық әкімшілігі Таяу Шығыс бағытындағы әуе кеңістігіне толық тыйым енгізді. Енді қазақстандық әуе компанияларына Иран, Израиль, Сирия, Ирак, Иордания және Ливан аумағында, сондай-ақ осы елдердің әуе кеңістігіне жақын аймақтарда ұшуға рұқсат берілмейді.

Көлік министрлігі Азаматтық авиация комитетінің мәліметінше, шектеулер азаматтық авиация үшін қауіп деңгейінің жоғары болуына байланысты енгізілген және арнайы бұйрық шыққанға дейін күшінде болады. Тыйым барлық тұрақты және тұрақты емес жолаушылар, жүк және техникалық рейстерге қатысты.

28 ақпанда қандай өзгерістер болды

Air Astana мен FlyArystan әуе компанияларының кестесіне өзгерістер енгізілді:

– KC263 Алматы – Медина, KC897 Алматы – Дубай, KC653 Алматы – Доха, сондай-ақ KC205 және KC207 Астана – Дубай рейстері ұшып кеткен әуежайларға кері қайтарылды;
– KC899 Алматы – Дубай рейсі Делиге бағытталды;
– FlyArystan компаниясының FS7617 Ақтау – Дубай рейсі қосалқы әуеайлаққа қонды;
– 28 ақпанда Таяу Шығысқа бағытталған өзге рейстер тоқтатылды.

SCAT әуе компаниясының 28 ақпан мен 1 наурыз күнгі кестесінде Таяу Шығыс бағытындағы рейстер қарастырылмаған.

Шетелдік тасымалдаушылардағы жағдай

Qatar Airways, Air Arabia, Air Arabia Abu Dhabi, Flydubai, Jazeera Airways, Air Cairo және Red Sea өкілдіктері бас кеңселерімен және туроператорлармен бірлесіп алдағы іс-қимыл жоспарын пысықтап жатқанын хабарлады.

Ирандық Qeshm Air компаниясы 28 ақпанда Таяу Шығыс бағытындағы рейстер кешігетінін мәлімдеді. Pars Air компаниясында 28 ақпаннан 3 наурызға дейін рейстер жоқ.

Жолаушылар қайда хабарласа алады

Авиациялық әкімшілік базасында тәулік бойы колл-орталық жұмыс істейді:
+7 7172 79 82 13
+7 7172 79 82 14
+7 7172 79 82 15

Рейстер мәртебесі бойынша:
Air Astana – +7 727 244 44 77, +7 7172 58 44 77, +7 702 702 44 77
FlyArystan – +7 727 331 1010, WhatsApp +7 702 702 0227
SCAT – +7 7252 99 88 80
Qazaq Air – +7 727 356 14 14

Нұрсұлтан Назарбаев халықаралық әуежайы – +7 7172 702 999
Алматы халықаралық әуежайы – +7 727 228 00 19

Жолаушыларға рейстердің мәртебесін әуе компанияларының ресми сайттарынан алдын ала тексеру ұсынылады.

Таяу Шығыста не болып жатыр

28 ақпан күні Иранның кемінде жеті қаласында жарылыстар болды. Израиль АҚШ-пен бірлесіп Иранға ракеталық соққы жасағанын мәлімдеді, кейін бұл ақпаратты АҚШ президенті Дональд Трамп растады. Иран жауап ретінде Израиль, Біріккен Араб Әмірліктері, Бахрейн, Катар және Кувейт бағытында ракеталар ұшырған.

Осыған байланысты Президент Қасым-Жомарт Тоқаев Таяу Шығыстағы ахуалдың ушығуына байланысты шұғыл іс-қимыл жоспарын әзірлеуді тапсырды.