«Қазақстан» шоколады мен «Раффаэлло» бақылауда: телефон арқылы сапаны тексеру мүмкіндігі пайда болды

Елімізде кондитерлік өнімдердің сапасын қадағалау мақсатында цифрлық таңбалау бойынша пилоттық жоба іске қосылды. Енді тұтынушылар «Қазақстан» шоколады, «Раффаэлло» конфеттері және басқа да танымал тәттілердің шынайылығын арнайы код арқылы анықтай алады, деп хабарлайды ҚР Сауда және интеграция министрлігі.

Сауда және интеграция министрлігінің мәліметінше, сынақ мерзімі 2027 жылдың 1 маусымына дейін созылады. Бұл бастаманың негізгі мақсаты – нарықты контрафактілік өнімдерден қорғау және тұтынушылардың қауіпсіздігін қамтамасыз ету.

Жоба аясында таңбаланатын өнімдер:

Шоколадтар, печеньелер, вафлилер, мармелад, джемдер, сондай-ақ жаңғақ және жеміс пасталары.

Қазақстандық нарықтағы көшбасшылар – «Баян Сұлу» және «Лотте Рахат» компанияларымен қатар, «Марс», «Ферреро», «Мон'дэлис» және «Нестле» сияқты халықаралық алпауыттар да өз өнімдерін таңбалауды сынақтан өткізіп жатыр.

Пилоттық жоба барысында бизнес өкілдері таңбалау процесін өз өндірістеріне тегін интеграциялап, техникалық жүйелерді пысықтайды. Айта кетейік, тауарлардың түпнұсқалығын eGov Mobile қосымшасы арқылы тексеруге болады. Сынақ қорытындысы бойынша таңбалауды міндетті ету немесе етпеу мәселесі шешілетін болады.