Қазақстан шетелге қоқыс сатып, пайда тауып жатыр

Қазақстан пластик пен макулатураны экспорттауды ұлғайтуда. Бұл туралы EnergyProm хабарлады.

2024 жылдың қаңтар-шілде айларында елден 11 мың тонна пластик қалдығы экспортталды, бұл 2023 жылдың сәйкес кезеңімен салыстырғанда 29,1%-ға көп. Пластик қалдықтарының негізгі сатып алушылары — Ресей (52,9%) және Өзбекстан (44,7%). Өзбекстан пластикті өңдеуді дамытуда белсенді жұмыс істеп жатыр.

Макулатура экспортының жағдайы да өзгерді. 2024 жылдың жеті айында 13,4 мың тонна қағаз қалдығы шетелге шығарылды, бұл өткен жылмен салыстырғанда 3,6 есе көп. Дегенмен бұл өсім 2023 жылғы төмен базаға байланысты болды. Қазақстандық макулатураның негізгі импорттаушылары — Ресей мен Грузия, соңғысы осы жылы алғаш рет қағаз қалдықтарын сатып алды.

Қазақстанда пластик қалдықтарын қайта өңдеу саласы әлі де қиындықтарға тап болып отыр. Қайта өңдеу зауыттары тек 30%-ға жүктелген, ал кейбіреулері 10%-ға дейін ғана жұмыс істейді. Қуаттылықтың төмен болуы шикізат тапшылығы, мемлекеттік қолдаудың аздығы және бизнестің инвестициялық тартымдылығының төмендігімен байланысты.

Сарапшылардың айтуынша, Қазақстанның пластик өңдеу саласы әлі де артта қалып отыр. Көршілес Өзбекстан, мысалы, пластикті тек қайта өңдеп қоймай, одан синтепон, жастықтарға толтырғыш және басқа да өнімдер шығарады. Қазақстанда бұл сала тек шикізат дайындаумен шектеліп отыр.