Қазақстан шетелге кофе сататынын білетін бе едіңіз?

Кофе күнделікті өміріміздің ажырамас бөлігіне айналды. Үйде, жұмыста, көшеде – кез келген жерде қолжетімді. Адамдар осы қоңыр сусынға үйренгені соншалық, оны жаяу жүріп те, көлікте келе жатып та ішеді. Қайда қарасаңыз да, кофе сататын орындар көзге түседі.

 

Таңертең ұйқыдан оянғанда, түскі үзілісте, кешкісін үйге қайтарда кофе ішу әдетке айналды. Достармен кездесуге де жайлы кофехананы таңдаймыз. Қала тұрғындарының өмірінде кофе тұтыну мәдениеті қалыптасты.

 

"Әлем бойынша кофе тұтынушылар саны артып, кофе бизнесі дамып келеді. Қазақстанда бұл сала жыл сайын 20 пайызға өсіп жатыр. Халықтың тұтыну көрсеткіші де жоғарылауда, кофе күнделікті өміріміздің бір бөлігіне айналды, - дейді кофе фестивальдерін ұйымдастырушы Айбек Аханов 24.kz-ке.

 

Мамандар кофені дұрыс уақытында және мөлшерімен ішу қажеттігін айтады.

 

"Кофені таңертеңгі уақытта 9.30-11.30 аралығында ішу керек. Ашқарынға ішуге болмайды, міндетті түрде таңғы аспен бірге ішу қажет. Қан қысымы жоғары адамдарға, жүкті әйелдерге және 14 жасқа дейінгі балаларға кофені тұтынуға болмайды", - дейді нутрициолог Фариза Сембаева.

 

Қазір Астанада 692 кофехана жұмыс істеп тұр. Сәуір айында екі гис қосымшасынан бұл орындарды іздеушілер саны 415 мыңнан асқан. Бұл көрсеткіш ай сайын артып келеді. Осыған байланысты, елімізде кофе импорты да өсіп жатыр.

 

2023 жылы Қазақстан шетелден 3100 тонна кофе сатып алды. Бірінші орында Ресей – 1100 тонна, екінші орында Бразилия – 823 тонна, одан кейін Италия – 426 тонна, Нидерланды – 122 тонна, Германия – 88 тонна, Колумбия – 60 тонна, Эфиопия – 58 тонна. Бұл 2022 жылмен салыстырғанда 5,5 пайызға артық көрсеткіш.

 

Қазақстанда шикізатты сатып алып, оны дайын өнімге айналдыратын шағын зауыттар жұмыс істейді. Алғашқы өндіріс орындарының бірі 2009 жылы Қарағанды қаласында ашылған.

 

"Кофе экваторлық аймақтарда өсетіндіктен, біз шикізатты еуропалық импорттаушылардан сатып алып, оны дайын өнімге айналдырамыз. Содан кейін кофеханаларға, мейрамханаларға және жеке тұтынушыларға жеткіземіз. Біз Қазақстандағы алғашқы өндірушіміз. Қарағандыда өндіреміз. Соңғы 5-6 жылда біздің қатарымыз көбейіп, әр түрлі қалаларда, орталықтарда және өңірлерде жаңа өндірістер пайда болды, - дейді кофе өндіретін компания директоры Павел Сериков.

 

Соңғы жылдары Қазақстан тек кофе импорттаушы ел ғана емес, аз мөлшерде болса да Ресей, Қырғызстан, Өзбекстан, Әзербайжан, Моңғолия секілді елдерге кофе экспорттаушы елге айналды. 2023 жылы Қазақстаннан жалпы құны 829 мың долларға 70 тонна кофе сатылды.