Қазақстан шетелдіктердің елге кіру тәртібін өзгертпек

Қазақстанда шетел азаматтары мен азаматтығы жоқ адамдардың елге кіру тәртібін өзгерту жоспарланып отыр. Ішкі істер министрлігі көші-қон қағидаларына өзгерістер енгізу туралы қаулы жобасын әзірледі.

Жобаға сәйкес, шетелдіктер Қазақстанға кіруге арналған рұқсатты электронды форматта цифрлық платформа арқылы ала алады. Министрліктің пікірінше, бұл көші-қон рәсімдерін жеңілдетіп, деректерді өңдеу уақытын қысқартады.

Қаулы жобасы 17 тамызға дейін қоғамдық талқылауға шығарылды.

Жоспар бойынша жаңа жүйені енгізу осы айда басталып, жыл соңына дейін толық іске қосылады.

Бұған дейін Қазақстан шетел азаматтарының елде тұрақты және уақытша тұруға рұқсат алу талаптарын күшейткен болатын. Енді тұрақты тұруға ниетті адамдардан қазақ тілін кемінде B2 деңгейінде меңгеруі талап етіледі. Сонымен қатар өтініш берушілердің қаржылық жағдайы, табысы, соттылығы мен құқық бұзушылықтары цифрлық жүйе арқылы тексеріледі.