Қазақстан шетел азаматтарына ID-карта енгізеді

Енді Қазақстанға келген әрбір шетел азаматына жеке ID-карта рәсімделеді. Бұл шешім Үкімет отырысында қабылданды. Премьер-Министр Олжас Бектенов жауапты министрліктерге 1 қарашаға дейін көші-қонды бақылайтын цифрлық платформаны іске қосуды тапсырды.

Жаңа жүйе жасанды интеллект көмегімен мигранттарды бақылап, олардың елдегі қозғалысы мен заңды мәртебесін қадағалайды.

Мигранттар саны артты, заңбұзушылық көбейді

Соңғы үш жылда шетелдік азаматтардың ағыны 42%-ға артқан, биыл 7 млн адам кірген. Жыл басынан бері 200 мың шетелдік әкімшілік жауапқа тартылып, 10 мыңы елден шығарылған.

“2 мыңнан аса жұмыс беруші шетелдіктерді заңсыз жұмысқа тартқаны үшін жазаланды”, - деді ІІМ өкілі Бауыржан Әленов.

Қандастарды елдің демографиялық әлеуеті төмен өңірлерге орналастыру көзделіп отыр.

Сонымен қатар, Үкімет отырысында қандастарды елдің халқы аз аймақтарына орналастыру жоспарланғаны айтылды. Оларға бейімделу, тіл үйрену, кәсіптік бағдар және тұрғын үймен қамту шаралары қолға алынады.

Автор: Рахат Жора