Қазақстан Ресейге 50 мың тонна бензин бере ме? Министрлік жауап берді

Қазақстанның Энергетика министрлігі Ресейден жанармай сатып алу жөнінде ресми өтініш түспегенін мәлімдеді. Алайда мұндай өтініш түссе, оны өзара тиімді коммерциялық шарттар негізінде қарастыруға дайын екенін хабарлады.

Ведомствоның мәліметінше, Қазақстан үшін басты міндет – ішкі нарықты жанар-жағармаймен толық әрі үздіксіз қамтамасыз ету. Сондықтан экспорттық жеткізілімдер елдегі тұтынушылар мен экономиканың қажеттілігіне қауіп төнбеген жағдайда ғана жүзеге асырылады.

Бұған дейін Reuters агенттігі саладағы төрт дереккөзге сүйеніп, Қазақстан шілде-тамыз айларында Ресейге 50 мың тонна бензинді гуманитарлық көмек ретінде жеткізуге келіскені туралы хабарлаған болатын. Алайда Энергетика министрлігі агенттікке Ресей үкіметінен мұндай көмек көрсету туралы ресми сұраныс болмағанын айтқан.

Сонымен қатар министрлік Батыс Қазақстан облысындағы «Конденсат» зауыты арқылы жанармай жеткізілуі мүмкін екенін жоққа шығармады. Ведомствоның түсіндіруінше, мұндай экспорт жүзеге асса, ол Ресейдің «Татнефть» компаниясы жеткізетін тікелей айдалған бензиннен өндірілетін болады.

Reuters мәліметінше, Ресейге АИ-92 және АИ-95 маркалы бензинді «Конденсат» зауыты мен Павлодар мұнай-химия зауыты жеткізуі мүмкін. Алайда бұл мәселе бойынша түпкілікті шешім қабылданған жоқ.