Қазақстан Ресейден келетін көліктерге утилалымды арттырады

Қазақстан Ресейден импортталатын автокөліктерге утилизациялық алымды арттырады. Бұл туралы Өнеркәсіп және құрылыс министрі Ерсайын Нағаспаев мәлімдеді.

Министрдің айтуынша, мұндай шешім екі елдің автомобиль нарығындағы бәсекелестікті теңестіру мақсатында қабылданған.

– Біз Ресей нарығына қатысты ешқандай жаңа талап енгізіп отырған жоқпыз, тек жағдайды айна-қатесіз қайталап отырмыз. Яғни екі елдің нарығында да тең мүмкіндік болуы тиіс. Ресей өз аумағында біздің көліктерге утилалымды бірнеше есе, тіпті ондаған есе көтерді және жыл сайын прогрессивті шкала енгізіп келеді, – деді Ерсайын Нағаспаев.

Оның айтуынша, Қазақстан нарығында ресейлік автокөліктердің үлесі шамамен 3,7% болады. Сондықтан Ресейден келетін көліктер бағасының күрт қымбаттауы екіталай.

Министр сонымен қатар қазақстандық тұтынушыларда жергілікті өндірістегі және қытайлық брендтердің автокөліктерін таңдау мүмкіндігі кең екенін айтты. Оның пікірінше, бұл көліктердің техникалық сипаттамалары ресейлік автокөліктерге қарағанда жақсырақ.