Қазақстан Ресейден әкелінетін көліктерге утиль алымын арттырмақ

Қазақстанда Ресейден әкелінетін автокөліктерге утиль алымын арттыру жоспарланып отыр, деп хабарлады Өнеркәсіп және құрылыс министрлігі. Ведомство бұл қадамды Қазақстан мен Ресей арасындағы алым мөлшеріндегі айырмашылықты жою қажеттілігімен түсіндірді.

Министрлік мәліметінше, қазіргі таңда екі елдегі утиль алымы әртүрлі болғандықтан, Еуразиялық экономикалық одақ аясында баға теңсіздігі қалыптасып отыр. Осыған байланысты төлем мөлшерін Ресейдегі деңгейге жуықтату көзделген.

Алым мөлшері артқан жағдайда Ресейден әкелінетін көліктердің бағасы сәл өсуі мүмкін. Дегенмен министрлік нарықта айтарлықтай қымбаттау болмайды деп есептейді. Себебі мұндай көліктердің үлесі жалпы сатылымда аз.

Ресми дерекке сәйкес, 2024 жылы Қазақстанда Ресейден әкелінген 883 көлік сатылған, бұл нарықтың 0,43%-ын құрайды. 2025 жылы бұл көрсеткіш 3088 көлікке жетіп, үлесі 1,31% болған. Елге көбіне Lada маркасының Granta, Vesta және Niva модельдері, сондай-ақ GAZ бен KamAZ компанияларының коммерциялық техникасы әкелінеді.