Қазақстан, Ресей және тағы төрт ел «экстремистер» туралы дерек алмасады

Қазақстан, Ресей, Беларусь, Қырғызстан, Тәжікстан және Өзбекстанның бас прокуратуралары терроризм мен экстремизмге қарсы іс-қимыл саласындағы ынтымақтастық туралы келісімге қол қойды. Құжат 30 қыркүйекте Қазанда өткен ТМД елдері бас прокурорларының үйлестіру кеңесінің отырысында қабылданды. 

Ұсынылған құжаттағы мәліметке сәйкес, алты ел өз аумағында террористік немесе экстремистік деп танылған ұйымдар, топтар және жекелеген адамдар туралы жедел ақпарат алмасуды көздеп отыр. Бұған дейін Қазақстан Бас прокуратурасы ТМД елдерімен осы бағыттағы көпжақты келісімдерге қол қою жоспарланғанын хабарлаған.

Келісім аясында мұндай топтардың халықаралық байланыстары, ықтимал террорлық әрекеттер мен мемлекеттердің егемендігіне төнетін қауіп туралы да ақпарат беріледі.

Сондай-ақ прокуратуралар шетелдік содырлар, өз еліне оралғандар және олардың отбасы мүшелері туралы мәлімет алмасады. Құжатта заңсыз қарулы құрылымдар, адам, қару-жарақ пен есірткі саудасына қатысы бар адамдар, заңсыз көші-қонды ұйымдастырушылар және жалған құжаттар туралы деректер де қамтылған.

Тамызда Қырғызстан үкіметі келісім жобасын мақұлдаған кезде құжатқа Беларусь, Қазақстан, Қырғызстан, Ресей, Тәжікстан және Өзбекстанның бас прокуратуралары қатысатыны хабарланған.

Дереккөзде «экстремизм» ұғымының қатысушы елдердің заңнамасында қолданылу аясы әртүрлі екені атап өтіледі. Сондықтан ақпарат алмасуға нақты қандай адамдар мен ұйымдар кіретіні әр мемлекеттің ұлттық заңнамасындағы шешімдерге байланысты болады.