Қазақстан Президенті мен Иордания Королі ынтымақтастықты жаңа деңгейге көтеруге уағдаласты

Ақордада Мемлекет басшысы Қасым-Жомарт Тоқаев пен Иордания Хашимит Королі ІІ Абдалла бен әл-Хусейннің кеңейтілген құрамдағы кездесуі өтті. Келіссөзге қос елдің ресми делегация мүшелері қатысты.

Президент Тоқаев Қазақстанның Иорданиямен өзара тиімді әріптестікті дамытуға айрықша мән беретінін атап өтті. Ол ІІ Абдалланың аймақтағы бейбітшілік пен тұрақтылықты қамтамасыз етудегі рөліне жоғары баға берді.

«Биыл ақпанда Иорданияға жасаған алғашқы ресми сапарымды ерекше ықыласпен еске аламын. Бүгінгі кездесу екіжақты қарым-қатынасқа тың серпін беріп, ынтымақтастығымыздың жаңа кезеңіне жол ашады», – деді Мемлекет басшысы.

Өз кезегінде ІІ Абдалла Қазақстан мен Иордания арасындағы достықты жоғары бағалап, әріптестікті кеңейтуге мүдделі екенін жеткізді. Оның айтуынша, бүгінгі уағдаластықтар екі елдің серіктестігін нығайтуға берік негіз қалайды.

Келіссөз барысында тараптар экономикалық ықпалдастықтың нақты бағыттарын талқылады. Тоқаев Аммандағы келіссөздер нәтижесінде тауар айналымын 500 млн долларға дейін ұлғайтуға уағдаласқанын еске салды. Қазақстан Иордания нарығына жалпы құны 250 млн доллар болатын 60 түрлі өнімді экспорттауға дайын. Сондай-ақ Президент «Қазатомөнеркәсіп» пен JUMCO арасындағы ынтымақтастықты қолдайтынын айтты.

Мемлекет басшысы көлік-логистика саласында Орталық Азия мен Таяу Шығыс арасында интермодальді жүк тасымалын дамытуға ниетті екенін жеткізді. Бұған қоса, ауыл шаруашылығы, туризм, цифрландыру салаларындағы әріптестікті кеңейту мүмкіндігі сөз болды.

Иордания тарапы медицина, фармацевтика, халал индустриясы мен қорғаныс өнеркәсібіндегі тәжірибесімен бөлісуге дайын екенін білдірді. Сонымен бірге Royal Jordanian әуе компаниясы келесі жылдан бастап Амман мен Алматы арасында тікелей рейс ашатынын хабарлады. Бұл қадам іскерлік байланыстарды күшейтіп, азаматтардың қатынасын жеңілдетеді.

Кездесуде мәдени-гуманитарлық ынтымақтастыққа да баса назар аударылды. Тараптар ғылыми-зерттеу жобаларын бірлесе жүзеге асыруға және университеттер арасындағы серіктестікті нығайтуға мүдделілік танытты.