Қазақстан Президенті қызметтен кеткен жағдайда, оның өкілеттігі вице-президентке өтеді

Қазақстанда мемлекет басшысының өкілеттігі мерзімінен бұрын тоқтатылған жағдайда билікті берудің жаңа тәртібін енгізу жоспарлануда.

Конституциялық реформа жөніндегі комиссияның отырысында Әділет министрі Ерлан Сарсембаев вице-президент лауазымын енгізу мемлекеттік биліктің тұрақтылығы мен үздіксіздігін қамтамасыз ететінін мәлімдеді.

Министрдің айтуынша, Президент өкілеттігін мерзімінен бұрын тоқтатқан жағдайда, елді уақытша басқару тікелей вице-президентке жүктеледі. Бұл қадам барлық мемлекеттік институттардың үйлесімді жұмысын сақтап, әлеуметтік міндеттемелер мен халықаралық келісімдердің орындалуына кепілдік бермек.

Ұсынылып отырған жаңа иерархия бойынша, егер вице-президент мемлекет басшысының міндетін қабылдай алмаса, өкілеттік Құрылтай төрағасына, ал оның да мүмкіндігі болмаған жағдайда Премьер-министрге өтеді. Бұл ретте президенттің міндетін уақытша атқарушы тұлға өзінің негізгі қызметін тоқтатуға міндетті болады. 

Министрдің пайымдауынша, билікті берудің мұндай айқын механизмі саяси тұрақтылықты сақтаудың кепілі болмақ. Жаңартылған заңнамаға сәйкес, Құрылтай тиісті қаулы қабылдаған сәттен бастап екі ай мерзім ішінде жаңа президент сайлануы тиіс. Бұған қоса, Е. Сарсембаев вице-президенттікке үміткерлерге қойылатын арнайы талаптар мен тыйымдардың дайындалып жатқанын атап өтті.