Қазақстан паспорты әлемдік рейтингте төрт сатыға көтерілді

Henley & Partners компаниясы әлем елдерінің паспорттарына қатысты кезекті рейтингін жариялады. Зерттеуге 199 мемлекеттің құжаты енген. Бағалау кезінде басты назар азаматтардың визасыз кіре алатын елдер санына аударылған.

Жаңартылған тізімге сәйкес, Қазақстан бір жыл ішінде төрт сатыға көтеріліп, 2025 жылғы 65-орыннан 61-орынға шықты. Бұл өзгеріс визасыз қатынауға болатын мемлекеттер санының 78-ге жетуімен байланысты. Аталған көрсеткіш Қазақстанды Орталық Азия аймағында бірінші орынға шығарды.

Рейтинг көшін Сингапур бастап тұр. Бұл елдің паспорты 192 мемлекетке визасыз кіруге мүмкіндік береді. Одан кейін Жапония мен Оңтүстік Корея (188 ел), сондай-ақ Дания, Люксембург, Испания, Швеция және Швейцария (186 ел) орналасқан.

Ал рейтингтің соңғы сатысында Ауғанстан тұр. Бұл ел азаматтары бар болғаны 24 мемлекетке визасыз бара алады.

Айта кетейік, Henley & Partners паспорттар рейтингін жиырма жыл бойы жасап келеді. Қазақстан азаматтары визасыз баруға болатын елдердің толық тізімін eGov порталы арқылы тексере алады.