Қазақстан-Норвегия: Холанд пен Эдегорға төтеп бере аламыз ба?

Бүгін футболдан Қазақстан ұлттық құрамасы Ұлттар лигасындағы ойынын бастайды. Станислав Черчесовтің шәкірттері Эрлинг Холанд пен Мартин Эдегор секілді жұлдыз ойыншылары бар Норвегия құрамасын қабылдайды.

Кездесу Алматыдағы Орталық стадионда өтеді. Матч Қазақстан уақытымен сағат 19:00-де басталады. Сондай-ақ матчты Qazsport телеарнасынан тікелей эфирде көруге болады.

ҚФФ 20 тамызда билеттерді онлайн-сатылымға шығарды. Барлық билет небәрі бір күнде сатылып кетті.  Осылайша, 23 804 көрермен сыятын стадионда аншлаг болады деп күтілуде. "Маркетинг последней надежды" Telegram арнасының есебінше, федерация билеттер сатылымынан 129 млн теңге пайда тапқан.

Алматыда ойнау құрамаға қалай әсер етеді?

Ұлттық құрама әдетте Astana Arena-да ойнайды. Алматыда соңғы рет 2020 жылы ойнаған. Осы орайда құрама капитаны Асхат Тағыберген Орталық стадион ойынға қаншалықты әсер ететіні жайында пікірін бөлісті.

“Алматы болса да, Астана болса да, бір Қазақстан ғой. Астанада жасанды алаң болса, Алматыда табиғи газон. Астананың өз артықшылықтары, Алматының өз артықшылықтары бар”, – деді капитан ойын алды баспасөз мәслихатында.

Холанд пен Эдегорға төтеп бере аламыз ба?

Норвегия құрамасы FIFA рейтиңінде 50-орында тұр. Құраманың құны – 456 млн еуро. Ең қымбат ойыншылары: Эрлинг Холанд (Манчестер Сити) – 180 млн еуро, Мартин Эдегор (Арсенал) – 110 млн еуро, Александр Сорлот (Атлетико Мадрид) – 25 млн еуро. Өткен маусымда Холанд ағылшын премьер-лигасының сұрмергені болса, Александр Сорлот Ла Лигада көп гол соққан екінші ойыншы атанды. Ал Мартин Эдегор – Арсеналдың капитаны. Тағыберген Норвегияның осы көшбасшылары жайлы ойын айтып өтті.

“Қанша жылдан бері хабарласпаған достарым менен билет сұрап жатыр. “Холандты көруге келе жатсыңдар ма, әлде бізге жанкүйер болуға ма?” деп сұраймын. Мен үшін қарсыластардың емес, өз құрамамның қалай ойнайтыны маңызды”, – деп пікір білдірді ол.

Журналистер Гвардиоланың “Холандты тапаншамен де тоқтату мүмкін емес” деген сөзін еске салып, бас бапкерден оған қарсы қорғануға мүмкіндік бар ма деп сұрады.

“Тапаншамен тоқтата алмасақ, демек AKM секілді сенімдірек қару табамыз. Ол жақсы ойыншы, Гвардиола не айтып тұрғанын біледі. Біз оның қабілетін білеміз. Біздің қаруымыз – ойыншыларымыз”, – деді Черчесов.

Ал Қазақстан құрамасы FIFA рейтиңінде 109-орында. Құны – 18,60 млн еуро. Біздің ең қымбат ойыншыларымыз: Бахтиёр Зайнутдинов (Бешікташ) - 5 млн еуро, Нұрәлі Әліп (Зенит) – 3 млн еуро.

Черчесовтің дебютінен не күтеміз? 

Қазақстан үшін бұл матч Черчесовтің дебюті тұрғысынан да маңызды. Черчесов команда басшылығына үш ай бұрын келгенімен, құрамамен толыққанды жұмыс істей алған жоқ. Команда матчтан бірнеше күн бұрын ғана Алматыда жиналып, дайындық жұмыстарын жүргізе бастады.

Норвегиялықтар тұрақты нәтиже көрсетпесе де, шабуылда өте қауіпті. Соңғы 16 ойынның 14-інде гол соққан. Дегенмен олардың осал тұсы қорғаныс болып тұр: соңғы 16 матчтың тек төртеуінде ғана гол өткізбеген.

Бапкерге шабуыл мен қорғаныс арасында дұрыс теңгерімді табу қажет. Норвегияға қарсы шабуылға күш салып, қорғанысты ұмыту — қауіпті, себебі қарсылас құрамда Холанд секілді сақа шабуылшылар бар. Алайда тым қорғанысқа жатып алу да дұрыс емес, өйткені бұл стандарт кезінде Норвегияның бойшаң ойыншыларына гол соғуға оңай мүмкіндік береді.

Черчесов үшін ең бастысы — ойыншылардың тәртіпті ойыны мен тактикалық жоспардың дұрыс орындалуы. Қарсыластың алғашқы 15 минутта гол соғып кетуіне жол бермеу қажет. Норвегиялықтардың қорғанысындағы осал тұстарын ескерсек, Қазақстанның гол соғуға мүмкіндігі бар, бірақ ол үшін суыққандылық пен жоғары дәлдік керек.

Қазақстан құрамасы Ұлттар лигасындағы келесі ойынын сырт алаңда – 9 қыркүйекте Словенияға қарсы өткізеді.