Қазақстан мұнайына жасалған шабуыл: Сыртқы істер министрлігі пікір білдірді

Қазақстан Республикасының Сыртқы істер министрлігі Қара теңізде мұнай танкерлерімен байланысты оқиғаларға қатысты ресми мәлімдеме жасады. Ведомствоның ресми өкілі Ерлан Жетібаевтің айтуынша, 13 қаңтарда Қара теңіз акваториясында Каспий құбыр консорциумы теңіз терминалына бағыт алған үш танкерге ұшқышсыз ұшу аппараттары арқылы шабуыл жасалған.

Осыған байланысты Қазақстан Республикасының Сыртқы істер министрлігі айтарлықтай алаңдаушылық білдіріп, бірқатар еуропалық мемлекеттің елшілерімен шұғыл кездесулер өткізген. Сондай-ақ америкалық тараппен және өзге де шетелдік серіктестермен байланыс барысында халықаралық құқық нормаларын қатаң сақтау, көмірсутегін тасымалдаудың, оның ішінде теңіз жолдарындағы қауіпсіздігін қамтамасыз ету мәселесіне ерекше назар аударылған.

Сыртқы істер министрлігі Қазақстанның қандай да бір қарулы қақтығыстарға қатысушы емес екенін және жаһандық әрі еуропалық энергетикалық қауіпсіздікті нығайтуға елеулі үлес қосып келе жатқанын атап өтті. Ведомство мәліметінше, энергия ресурстарын жеткізудің үздіксіздігі халықаралық талаптарға толық сәйкес қамтамасыз етіліп отыр. Осыған орай аталған танкерлердің барлық қажетті рұқсаттары болғаны және талап етілетін сәйкестендіру жабдықтарымен жабдықталғаны айтылды.

Министрлік соңғы уақытта мұндай оқиғалардың жиілеуі халықаралық энергетикалық инфрақұрылымның тұрақты жұмысына төнетін тәуекелдердің артқанын көрсететінін мәлімдеді. Осыған байланысты Қазақстан серіктес елдерді осындай жағдайлардың алдын алу үшін бірлескен шаралар әзірлеу мақсатында тығыз өзара іс-қимылға шақырды.