«Қазақстан мұнайына тиіспеңдер!»: АҚШ Украинаға ресми ескерту жасады

АҚШ Қара теңіздегі Каспий құбыр консорциумы нысандарына жасалған шабуылдардан кейін Украинаға Қазақстандағы америкалық экономикалық мүдделер туралы ескерту жасаған. Бұл туралы CNN телеарнасы хабарлады.

Украинаның АҚШ-тағы елшісі Ольга Стефанишинаның айтуынша, Новороссийскідегі шабуылдар Қазақстан арқылы жүзеге асатын америкалық инвестицияларға әсер еткен. Осыған байланысты АҚШ Мемлекеттік департаменті Киевке ресми дипломатиялық нота жолдаған.

– Бізге америкалық мүдделерге соққы жасамау қажет екені айтылды. Әңгіме Ресейдің әскери немесе энергетикалық инфрақұрылымына шабуылдан бас тарту туралы емес, нақты экономикалық мүдделер туралы болды. Біз мұны ескердік, – деді елші.

CNN мәліметінше, 2025 жылғы қарашада украиналық дрондар Новороссийск портын нысанаға алған. Соның салдарынан ресейлік нысандармен бірге мұнай құбыры да зақымданып, қазақстандық мұнай экспорты айтарлықтай қысқарған. Телеарна Chevron компаниясы КҚК-ның ірі акционерлерінің бірі екенін атап өтті.

Елші сондай-ақ АҚШ-тың Қазақстанда елеулі экономикалық мүддесі бар екенін, ал Украинада мұндай деңгейдегі инвестициялық қатысу қалыптаспағанын жеткізді. Сонымен бірге ол Вашингтонды Ресейге қарсы санкцияларды күшейтуге шақырып, бұл мәселенің кешеуілдеуі Мәскеу үшін тиімді екенін айтты.

Айта кетейік, КҚК – Қазақстан мұнайын Қара теңіз арқылы әлемдік нарыққа жеткізетін негізгі экспорттық бағыттардың бірі.