Қазақстан мұнайын тасымалдайтын танкерлер дрон шабуылына ұшырады

Каспий құбыр консорциумы (КҚК) терминалы маңында Қазақстан мұнайын тиеуге тиіс болған екі мұнай танкеріне ұшқышсыз аппараттармен шабуыл жасалды. Бұл туралы Reuters агенттігі бірнеше дереккөзге сүйене отырып хабарлады.

Ақпаратқа сәйкес, шабуылға ұшыраған кемелерді грек компаниялары басқарады. Delta Harmony танкері Delta Tankers компаниясының басқаруында болған және «Теңізшевройл» консорциумы өндірген мұнайды тиеуі тиіс еді. Ал Matilda танкері Thenamaris компаниясына тиесілі, ол Қарашығанақ кен орнынан өндірілген мұнайды қабылдауға дайындалып тұрған.

Thenamaris өкілінің айтуынша, Matilda танкеріне екі дрон соққы берген. Сол сәтте кеме КҚК терминалынан шамамен 30 миль қашықтықта, жүксіз күйде тұрған. Зардап шеккендер жоқ, палубадағы кейбір құрылымдар ғана жеңіл зақымданған. Алдын ала бағалау бойынша, кеме жүзуге жарамды және аймақтан шығып кеткен.

Delta Tankers компаниясы оқиғаға қатысты Reuters агенттігінің сауалына жедел жауап бермеген. Ал теңіз қауіпсіздігі саласындағы дереккөздер шабуылдан кейін кемеде өрт шыққан болуы мүмкін екенін, алайда оның тез арада сөндірілгенін мәлімдеді.

Каспий құбыр консорциумы жағдайға байланысты түсініктеме беруден бас тартты. Айта кетейік, КҚК арқылы Қазақстан мұнайының шамамен 80 пайызы Қара теңіздегі Новороссийск маңында орналасқан «Оңтүстік Озереевка» терминалына жеткізіледі.

Энергетика министрлігінің мәлімдемесі

Қазақстан Республикасының Энергетика министрлігі қазіргі уақытта КҚК терминалында мұнай жөнелту ВПУ-1 арқылы жүзеге асырылып жатқанын хабарлады.

Министрліктің мәліметінше, технологиялық процесс қалыпты режимде жүріп жатыр, тек теңіздегі ауа райы жағдайына байланысты белгілі бір түзетулер енгізілген. Ведомство жағдайды бақылауда ұстап, консорциум серіктестерімен тұрақты байланыста екенін атап өтті.