Қазақстан мұнайы бағытын өзгертті: 300 мың тонна шикізат Еуропа мен Азияға бағытталды

«ҚазМұнайГаз» мәліметінше, өткен жылдың соңында Каспий құбыр консорциумы (КҚК) жүйесі арқылы Қазақстан мұнайын тасымалдауға шектеу қойылуына байланысты, шикізатты «ҚазТрансОйл» (ҚТО) жүйесі арқылы басқа экспорттық бағыттарға жедел қайта бағыттау жұмыстары жүргізілді.

Шамамен 300 мың тонна мұнай көлемі экспорттық бағыттарға (Германия, Қытай, Баку-Тбилиси-Жейхан, Новороссийск және Усть-Луга порттары арқылы) жеткізу үшін ҚТО жүйесіне ауыстырылды. 2026 жылдың қаңтарында КҚК тарапынан мұнай қабылдауға қатысты шектеулердің сақталуына байланысты, шикізатты басқа бағыттарға бұру шаралары жалғасатын болады.

Қазақстан мұнайын тасымалдаудың қосымша бағыттары бойынша жұмыс жалғасуда:

Германия бағыты: 2025 жылдың қорытындысы бойынша Германияға (Шведт қаласындағы МӨЗ) мұнай жеткізу көлемінің өсу динамикасы байқалады. Көрсеткіш 2,1 млн тоннаны құрады. 2026 жылы бұл көлемді 2,5 млн тоннаға дейін арттыру жоспарлануда.

Баку-Тбилиси-Жейхан (БТЖ): Ақтау портынан БТЖ бағыты бойынша 1,3 млн тонна мұнай жөнелтілді. 2026 жылы бұл көрсеткішті 1,6 млн тоннаға дейін жеткізу көзделіп отыр.

Қытай бағыты: Қытай Халық Республикасына қазақстандық мұнайды экспорттаудың тұрақты көрсеткіші сақталуда. 2025 жылдың қорытындысы бойынша ҚХР-ға 1,1 млн тонна мұнай экспортталды.