Қазақстан мен Вьетнам әуе қатынасын кеңейтіп, тауар айналымын арттырмақ

Қазақстан мен Вьетнам арасындағы әуе қатынасы кеңейіп, Астана мен Ханой арасында тікелей рейстер ашылуы мүмкін. Бұл туралы Қазақстан Премьер-министрінің орынбасары Серік Жұманғарин мен Вьетнам Премьер-министрінің тұрақты орынбасары Нгуен Хоа Бинь арасындағы келіссөздер барысында белгілі болды.

Кездесуде тараптар биыл «VietJet Air» авиакомпаниясының Ханой – Алматы – Прага бағыты бойынша тұрақты рейстерін іске қосу мәселесін талқылады. Сонымен қатар, қазақстандық тарап Алматы – Хошимин рейсін қайта жандандыруды және елордамыз Астана мен Вьетнам астанасы Ханой арасында тікелей әуе байланысын орнатуды ұсынды.

Экономикалық ынтымақтастық аясында Қазақстан өзара тауар айналымын екі есеге арттыруды көздеп отыр. Еліміз экспорттық әлеуетті ұн, ет және сүт өнімдері есебінен кеңейтуге ниетті. Логистика саласында «Орта дәліз» ретінде танымал Транскаспий халықаралық көлік бағытын пайдалану ұсынылды. Бұл бағыт жүк жеткізу мерзімін оңтүстік теңіз жолымен салыстырғанда 3-4 есеге қысқартуға мүмкіндік береді.

Инвестициялық серіктестік те қарқынды дамып келеді. Қазіргі таңда вьетнамдық капиталдың қатысуымен Алматы облысында «Ak Bulak Village» туристік кешені салынып жатса, Қонаев қаласында құны 45,6 млрд теңгені ($90 млн) құрайтын тамақ өнімдері зауытының құрылысы жүргізілуде.

Келіссөздер қорытындысы бойынша тараптар «Қазақстан-Вьетнам іскерлік кеңесін» құру туралы меморандумға қол қоюға уағдаласты. Сондай-ақ Вьетнам тарапы Хошимин қаласында халықаралық қаржы орталығын құру үшін «Астана» халықаралық қаржы орталығының (АХҚО) тәжірибесін зерттеуге зор қызығушылық танытты.