Қазақстан мен Ресей маркетплейстерді біріктіруі мүмкін – ресейлік шенеунік

Ресей мен Қазақстан онлайн-сауда платформаларын ықпалдастыру бағытында жұмыс жүргізіп жатыр. Бұл туралы Ресей сыртқы істер министрінің орынбасары Михаил Галузин Ресей–Қазақстан медиафорумы аясында ТАСС агенттігіне берген сұхбатында айтты.

Галузиннің сөзінше, бұл мәселе Ресейдегі логистикалық инфрақұрылымға дрон шабуылдары басталғанға дейін-ақ талқыланған. Ол мұны ресейлік компаниялардың Қазақстандағы қойма желісін кеңейту жоспарына қатысты сұраққа жауап беру кезінде мәлімдеді.

Ресей дипломатының айтуынша, бүгінде Ozon және Wildberries платформаларында Қазақстаннан жүздеген мың кәсіпкер сауда жүргізеді. Wildberries дерегіне сәйкес, 2025 жылы платформада Қазақстаннан 120 мыңнан астам кәсіпкер тіркелген.

Бұған дейін бірқатар БАҚ Wildberries Қазақстанда қосымша қойма салу немесе жалға алу мүмкіндігін қарастырып жатқанын хабарлаған еді. Алайда Қазақстанның Сауда және интеграция министрлігі компаниядан бұл мәселеге қатысты ресми өтініш түспегенін мәлімдеген.

Қазақстан тарапы Ресей өкілінің маркетплейстерді ықпалдастыру туралы мәлімдемесіне әзірге ресми түсініктеме берген жоқ.