Қазақстан мен Ресей АЭС салу жөніндегі келісімге қол қоймақ

Қазақстан президенті Қасым-Жомарт Тоқаев Ресей президенті Владимир Путинмен шағын құрамдағы келіссөз барысында Қазақстанда атом электр станциясын салуға қатысты келісімге қол қойылатынын мәлімдеді.

Мемлекет басшысы Ресей президентінің Астанаға мемлекеттік сапары екі ел арасындағы стратегиялық серіктестік пен одақтастық қатынасты дамыту тұрғысынан маңызды екенін айтты. Оның сөзінше, келіссөздер қорытындысында екі ел арасындағы стратегиялық серіктестіктің жеті негізі туралы бірлескен мәлімдеме қабылданады.

“Екіншісі, Қазақстанда атом электр станциясының құрылысына қатысты келісімге қол қою. Осы жобаға қолдау көрсеткеніңіз үшін Сізге ризашылығымды білдіремін. АЭС құрылысы туралы келісімнің стратегиялық мәні жөнінде айта беру артық. Бұл бәріне түсінікті”, – деді Қасым-Жомарт Тоқаев.

Президент Қазақстан мен Ресейдің тарихи байланысына тоқталып, екі ел халықтарының мәдени дәстүрі мен дүниетанымында ұқсастық көп екенін атап өтті. Сондай-ақ мемлекеттер арасындағы достық пен ынтымақтастықты сақтау халықтардың ортақ мүддесіне сай келетінін айтты.

Владимир Путин өз кезегінде Қазақстанға шақырғаны үшін алғыс білдіріп, екі ел арасындағы стратегиялық әріптестіктің өзара құрмет пен достыққа негізделгенін жеткізді. Ресей президенті бейресми кездесу барысында тараптар ықпалдастықтың көптеген маңызды бағытын талқылағанын айтты.