Қазақстан мен Өзбекстан арасында алғашқы теміржол туры іске қосылады

Қазақстанда «Жібек жолы» атты жаңа теміржол туры іске қосылады. «Алматы – Түркістан – Ташкент – Алматы» бағыты бойынша алғашқы рейс 2024 жылдың 16 қарашасында жолға шығады, деп хабарлады Туризм және спорт министрлігі.

Төрт күнге халықаралық теміржол туры туристерге ежелгі қалалардың атмосферасына еніп, Ұлы Жібек жолының ізімен саяхаттауға мүмкіндік береді. Маршрут Түркістан мен Ташкенттің басты көрікті жерлерін қамтиды. Туристерге ыңғайлы болу үшін тур бағдарламасында гид қызметі, тамақтану, көлік қызметі және кіру билеттері қарастырылған.

Сондай-ақ саяхатшылар Орталық Азия аумағындағы ең көне қалалардың бірі – Отырар қаласымен таныса алады. Тур бағдарламасына Арыстан-баба кесенесіне, «Әзірет Сұлтан» тарихи-мәдени қорық-музейіне, Орталық Азиядағы өз кезегінде ең үлкен «Керуен-Сарай» туристік кешеніне бару кіреді. Ташкенттегі тур аясында қаланың тарихи нысандарымен ғана емес, сонымен қатар заманауи дамуымен де танысуға болады.

Халықаралық турды «Tau Komek Travel», «Тұран Қазақстан Тревел», «Grand Soluxe Travel Company», «SkyWay Travel», «Kompas», «KhanTuran Travel» компанияларымен бірлесіп «Жолаушылар тасымалы» АҚ іске асырады. Ал «Kazakh Tourism» ҰК» АҚ маршруттың халықаралық деңгейде насихатталуына қолдау көрсетедI.

Туристік агенттіктердің хабарландыруларына сәйкес, 16-20 қараша аралығындағы экскурсиялар, тамақтану және Ташкент қонақүйінде түнеуді қоса алғанда, толық турпакет құны:

ересек адамға – шамамен 135 мың теңге;
бес жастан 15 жасқа дейінгі балаға – шамамен 100 мың теңге.

Дегенмен, туристер тек пойыз билеттерін сатып ала алады:

ересек – шамамен 70 мың теңге;
балаларға – шамамен 35 мың теңге.