Қазақстан мен Орталық Азиядағы алғашқы балалар нейрохирургиялық роботы Өскеменге орнатылады

Өскемендегі Ана мен бала орталығына Қазақстан мен Орталық Азияда балаларды емдеуде қолданылатын алғашқы роботтандырылған нейрохирургиялық жүйе орнатылады. Жасанды интеллект технологияларымен жабдықталған Remebot RM-200 күрделі оталарды жоғары дәлдікпен жасауға және бұған дейін өңірде қолжетімсіз болған емдеу әдістерін енгізуге мүмкіндік береді.

Жабдықтың құны – 433,5 млн теңге. Оны «Самұрық-Қазына» компаниялар тобының қайырымдылық қызметі аясында «Samruk-Kazyna Trust» қоры сатып алады. Жүйені жеткізуге арналған сертификатты Шығыс Қазақстан облысына жұмыс сапарымен келген «Самұрық-Қазына» АҚ басқарма төрағасы Нұрлан Жақыпов табыстады.

Remebot RM-200 нейрохирургиялық навигация мен стереотаксикалық хирургия технологияларын бір жүйеге біріктіреді. Жасанды интеллект мүмкіндіктерін пайдалана отырып, дәрігерлер операцияны алдын ала жоспарлап, мидың үш өлшемді моделін жасай алады. Сондай-ақ жүйе хирургиялық араласудың оңтайлы траекториясын жоғары дәлдікпен анықтауға көмектеседі.

Жаңа технологияның енгізілуімен Ана мен бала орталығында жасалатын күрделі оталардың қатары көбеймек. Атап айтқанда, мамандар стерео-ЭЭГ жүргізіп, эпилепсиялық белсенділік ошақтарын анықтау үшін терең электродтар орната алады. Сонымен бірге стереотаксикалық араласулар жасауға және мидың терең бөліктерінде орналасқан ісіктерден аз инвазивті әдіспен биопсия алуға мүмкіндік туады.

Жүйенің қуаты жылына 750 ота жасауға жетеді

Балалар нейрохирургиясы қазірдің өзінде Өскемендегі Ана мен бала орталығының негізгі медициналық бағыттарының біріне айналған. Мұнда Шығыс Қазақстан облысымен қатар Абай және Павлодар облыстарынан келген балалар да ем қабылдайды.

Орталықтағы нейрохирургия бөлімшесі 22 төсек-орынға есептелген. Соңғы үш жылда дәрігерлер эпилепсияның ауыр түрлерін емдеудің заманауи тәсілдерін қолданып келеді. Соның бірі – кезбе жүйке стимуляторын имплантациялау арқылы жүргізілетін VNS-терапия.

Үш жыл ішінде осындай шамамен 33 операция жасалған. Мамандардың мәліметінше, емнен кейін пациенттердегі эпилепсиялық ұстамалардың жиілігі мен ауырлығы төмендеген.

Жаңа роботтандырылған жүйе орталықтың осы бағыттағы мүмкіндігін айтарлықтай арттырмақ. «Самұрық-Қазына» АҚ басқарма төрағасы Нұрлан Жақыповтың айтуынша, Remebot RM-200 техникалық мүмкіндігі жылына 500-ден 750-ге дейін операция жасауға жетеді.

«Біздің міндетіміз – медициналық инфрақұрылымды жүйелі түрде дамыту, медициналық ұйымдарды заманауи жабдықтармен қамтамасыз ету және дәрігерлердің кәсіби тұрғыдан өсуіне жағдай жасау. Эпилепсия, ісік және жүйке жүйесінің басқа да ауруларына шалдыққан пациенттер қажетті медициналық көмекті ала алады. Кешеннің техникалық қуаты жылына 500-750 ота жасауға мүмкіндік береді», – деді Нұрлан Жақыпов.

Үш облыстың балалары Өскеменде ем ала алады

Биылғы жылдың алғашқы жеті айында Ана мен бала орталығында 9 590 пациент ем қабылдаған. Медициналық мекеме тәулік бойы жұмыс істеп, жоспарлы еммен қатар шұғыл медициналық көмек көрсетеді.

Орталықтың стационары 347 төсек-орынға арналған. Мұнда 141 дәрігер еңбек етеді.

Шығыс Қазақстан облысының әкімі Нұрымбет Сақтағанов жаңа технологияның енгізілуі күрделі нейрохирургиялық көмек алу үшін балаларды басқа өңірлерге жіберу қажеттілігін азайтуға мүмкіндік беретінін атап өтті.

«Біздің өңір үшін балалар нейрохирургиясын дамыту ерекше маңызды. Бүгінде орталық мамандары үш облыстың балаларын қабылдап, күрделі оталар жасап, емдеудің заманауи әдістерін енгізіп келеді. Жаңа жабдық бұл мүмкіндіктерді одан әрі кеңейтіп, бұрын аймақта қолжетімсіз болған технологияларды енгізуге жол ашады. Шығыс Қазақстанның ғана емес, Абай және Павлодар облыстарының балалары да қажетті жоғары технологиялық медициналық көмекті осы жерде, Өскемен қаласында ала алады деп сенеміз», – деді Нұрымбет Сақтағанов.

Робот жыл соңына дейін іске қосылады

Remebot RM-200 жүйесін Ана мен бала орталығына жыл соңына дейін жеткізіп, орнату және пайдалануға беру жоспарланған.

Жабдық орнатылғаннан кейін дәрігерлер мен орталықтың басқа да мамандары арнайы дайындықтан өтеді. Роботтың көмегімен жасалатын жаңа операция түрлері бірден емес, кезең-кезеңімен енгізілмек.

Роботтандырылған жүйенің басты артықшылықтарының бірі – хирургиялық араласудың дәлдігін арттыру. Дәрігерлер мидың қажетті бөлігіне барынша дәл жетіп, сау тіндерге түсетін әсерді азайта алады. Бұл операцияның жарақаттылығын төмендетіп, қауіпсіздігін арттыруға мүмкіндік береді.

Жаңа технология әсіресе эпилепсияның күрделі түрлерін, ми ісіктерін және жүйке жүйесінің басқа да ауруларын хирургиялық жолмен емдеу кезінде пайдаланылмақ.

Remebot RM-200-дің іске қосылуы Ана мен бала орталығында жасалатын нейрохирургиялық операциялардың түрін көбейтіп қана қоймай, Өскеменнің өңірлік балалар нейрохирургиясы орталығы ретіндегі мүмкіндігін кеңейтеді. Нәтижесінде Шығыс Қазақстан, Абай және Павлодар облыстарындағы балалардың бір бөлігі күрделі операция үшін республикалық орталықтарға немесе шетелдік клиникаларға бармай-ақ, жоғары технологиялық медициналық көмекті Өскеменде ала алады.