Қазақстан мен Қытай бір-бірінің жүргізуші куәліктерін мойындамақ

Қазақстан мен Қытай жүргізуші куәліктерін өзара тану және алмастыруды жоспарлап отыр. Екі ел арасындағы тиісті келісімге қатысты Үкімет қаулысының жобасы «Ашық нормативтік-құқықтық актілер» порталында жарияланды.

Келісім қабылданса, Қазақстан мен Қытай азаматтары белгілі бір талаптарды сақтай отырып, екінші елде жеңіл көлік жүргізе алады.

Жобаға сәйкес, жүргізушілерге жергілікті автомектепте қайта оқып, емтихан тапсыру қажет болмайды. Олар өз елінде берілген жүргізуші куәлігінің негізінде екінші мемлекетте көлік жүргізу құқығына ие болмақ.

Әзірге бұл тәртіп B1 санатындағы жүргізуші куәліктеріне қатысты екені көрсетілген.

Қазақстан мен Қытай арасында 2023 жылғы қарашадан бері өзара визасыз тәртіп қолданылады. Содан бері Қазақстанға келетін Қытай азаматтарының саны артқан.

Құжат әзірге қаулы жобасы ретінде жарияланған. Сондықтан жүргізуші куәліктерін өзара тану тәртібі әлі күшіне енген жоқ.