Қазақстан мен әлем елдері гуманитарлық құқықты қатаң сақтауды талап етті

Қазақстан Бразилия, Иордания, Қытай, Франция және Оңтүстік Африка Республикасымен бірлесіп, Халықаралық Қызыл Крест Комитетімен (ХҚКК) бірге соғыс кезінде ізгілікті сақтау қажеттігін алға тартқан ортақ мәлімдеме жасады.

Мемлекет басшылары өз үндеуінде әлемдегі қақтығыстар кезінде халықаралық гуманитарлық құқықтың (ХГҚ) кең көлемде бұзылып отырғанына және соның салдарынан туындаған адамзаттық қасіреттерге алаңдаушылық білдірді. Олар барлық елді және қарулы қақтығыс тараптарын ХГҚ нормаларын қатаң сақтауға шақырды. Әсіресе бейбіт тұрғындарды, азаматтық инфрақұрылымды, медицина қызметкерлері мен гуманитарлық ұйым өкілдерін қорғаудың маңызы атап өтілді.

Сонымен қатар мәлімдемеде 2026 жылы соғыс жағдайында ізгілікті сақтауға арналған жоғары деңгейдегі жаһандық кездесу өтетіні жарияланды.

Бұл үндеу халықаралық гуманитарлық құқыққа саяси бейілділікті күшейту жөніндегі Жаһандық бастаманы ілгерілету аясында жасалды. Аталған бастама ХГҚ-ны неғұрлым қатаң сақтауды қамтамасыз етуге бағытталған практикалық ұсынымдар әзірлеуді көздейді. Ол 2024 жылғы 27 қыркүйекте Нью-Йоркте БҰҰ Бас Ассамблеясының 79-сессиясы аясында бастамашы алты елдің сыртқы істер министрлері мен ХҚКК өкілдерінің қатысуымен жарияланған еді.

Қазіргі таңда бастамаға 89 мемлекет ресми түрде қосылды, ал 130-дан астамы жеті тақырыптық бағыт бойынша жаһандық және өңірлік консультацияларға атсалысты.

Бірлескен мәлімдеме БҰҰ-ның алты ресми тілінде, сондай-ақ қазақ және португал тілдерінде жарияланды.