Қазақстан медицинасындағы халықаралық интеграция Түркістаннан басталды

Түркістан қаласындағы Қожа Ахмет Ясауи атындағы халықаралық қазақ-түрік университетінде «Білім беруге инвестиция – мейіргер ісінің тұрақты дамуы» атты Қазақстан мейіргер ісі мамандарының IV съезі өз жұмысын басталды. Бұл жөнінде Түркістан облысының әкімдігі хабарлады. Ауқымды халықаралық шараны аталған жоғары оқу орны, Қазақстан Республикасы Денсаулық сақтау министрлігі және «Мейіргер ісі мамандары» республикалық қоғамдық бірлестігі бірлесе ұйымдастырды.

Ауқымды жиынның басты мақсаты - мейіргерлік қызметтің халықаралық стандарттары мен осы саладағы үздік әлемдік тәжірибелерді ұлттық денсаулық сақтау жүйесіне интеграциялауға ықпал ету болып табылады. Сонымен қатар алқалы жиында медициналық көмек көрсетудің барлық деңгейлерінде мейіргерлердің институционалдық және басқарушылық рөлін арттыру, мейіргер ісіндегі кадрлық саясатты жетілдірудің стратегиялық бағыттарын әзірлеу мәселелері талқылануда. Шараның тағы бір маңызды бағыты - дәлелді практиканы, инновациялық білім беру модельдерін және қазіргі заманғы цифрлық технологияларды мейіргерлердің кәсіби қызметіне енгізуді ынталандыру.

Халықаралық деңгейдегі жиынға отандық медицина саласының 300-ге жуық өкілі, профессор-оқытушылар құрамы, сондай-ақ Түркия Республикасының «Medipol», «Medipol Mega», «Medicana» секілді жетекші университеттік клиникаларының өкілдері мен Қырғызстан медициналық колледждері қауымдастығының делегаттары қатысуда.

Шараның салтанатты ашылу рәсімінде ҚР Денсаулық сақтау министрі Ақмарал Әлназарованың бейнеқұттықтауы ұсынылды. Ведомство басшысы өз сөзінде мейіргер мамандығының денсаулық сақтау жүйесіндегі орны мен маңызына ерекше тоқталып, бұл кәсіптің жоғары жауапкершілік пен терең білімді қажет ететін ізгі сала екенін атап өтті. Сонымен қатар Түркістан облысы Денсаулық сақтау басқармасының басшысы Асхан Байдуалиев, ҚР Парламенті Сенатының депутаты Айнұр Арғынбекова және Дүниежүзілік денсаулық сақтау ұйымының (ДДСҰ) Қазақстандағы елдік офисінің басшысы Сыла Скендер қатысушыларға өздерінің жылы лебіздері мен құттықтауларын жолдады.

Басқосу барысында Қожа Ахмет Ясауи атындағы халықаралық қазақ-түрік университетінің ректоры Жанар Темірбекова сөз сөйлеп, білім ордасында медицина бағыты бойынша 3 факультет жұмыс істейтінін мәлімдеді. Ол өз баяндамасында кәсіби және сапалы медициналық қызмет көрсетуде мейіргер ісінің маңызы жоғары екенін және бұл мамандық халықаралық деңгейде жоғары бағаланатынын атап өтті.

Ресми шара аясында денсаулық сақтау саласы мен медицина ғылымын дамытуға елеулі үлес қосып жүрген бірқатар маман ҚР Денсаулық сақтау министрлігінің арнайы Алғыс хаттарымен марапатталды. Марапаттау рәсімінен кейін съезд жұмысы Ғылым және стратегиялық даму жөніндегі вице-ректор Айнаш Ошибаеваның модераторлығымен өткен пленарлық отырысқа ұласты.

Жиын аясында пленарлық сессиялар, халықаралық симпозиумдар, шеберлік сабақтары, арнайы көрмелер мен дөңгелек үстелдер ұйымдастырылуда. Сондай-ақ мейіргер ісіне жаңа технологияларды енгізу, кәсіби білім беруді дамыту, көшбасшылық қасиеттерді қалыптастыру және заманауи кадрларды даярлау мәселелері кеңінен қозғалып жатыр. Халықаралық деңгейдегі бұл тәжірибе алмасу шарасы осы жылдың 23 мамырына дейін жалғасады.