Қазақстан легионерлерді қаржыландырудан бас тартып, 8 млрд теңгеден астам қаржы үнемдеді

Қазақстанда кәсіби спорт клубтарын қаржыландыруға шектеу енгізу және шетелдік легионерлерге бюджеттен ақша бөлуден толық бас тарту нәтижесінде 8 млрд теңгеден астам қаржы үнемделді, деп хабарлады Туризм және спорт министрлігі.

Ведомствоның мәліметінше, дене шынықтыру және спорт мәселелері жөніндегі заңға енгізілген өзгерістер бюджет қаражатын бөлшектеп жұмсауды азайтып, спорт резерві мен басым бағыттарды қаржыландыруды арттыруға мүмкіндік берген.

«Кәсіби клубтарды қаржыландыруға шектеу енгізу және легионерлерді қаржыландырудан толық бас тарту есебінен бюджет қаражатының 8 млрд теңгеден астамы үнемделді. Балалар спортын қаржыландыру екі есеге жуық өсті. Балалар мен жасөспірімдер спорт мектебінің бір тәрбиеленушісіне жылына 233 мың теңгеден 415 мың теңгеге дейін ұлғайтылды», – делінген министрлік хабарламасында.

Сонымен қатар жаттықтырушылардың еңбекақысын кезең-кезеңімен көтеру қолға алынған. Балалар мен жасөспірімдер спорт мектептері жаттықтырушыларының жалақысы қазірдің өзінде 30 пайызға өскен. Министрлік мәліметінше, тиісті сынақтан өтуге 3 511 жаттықтырушы-оқытушы кіріскен.

Дене шынықтыру және спорт саласын жетілдіруге бағытталған заңға президент былтыр сәуірде қол қойған. Құжат аясында спорттың басым түрлерінің республикалық және өңірлік тізімдері, жоғары жетістіктер спортының бағыттары және оларды бюджеттен қаржыландыру тәртібі белгіленді.

Басым спорт түрлері халықаралық жарыстардағы нәтижелерге қарай анықталады. Олардың қатарына Олимпиада, Паралимпиада, Сурдлимпиада, Азия және Пара Азия ойындарының бағдарламасына кіретін спорт түрлері, сондай-ақ ұлттық спорт түрлері жатады.

Заң бойынша шетелдік легионерлерді бюджет және квазимемлекеттік сектор қаражаты есебінен қаржыландыруға тыйым салынған. Бюджет қаражаты жоғары жетістіктер спортына, мемлекеттік дене шынықтыру және спорт ұйымдарының жұмысына, бұқаралық спорт пен спорт инфрақұрылымын дамытуға бағытталады.

Сонымен бірге спортшыларды даярлаудың бірыңғай талаптары әзірленіп, «спорттық даярлықтың ұлттық стандарттары» ұғымы енгізілді. Жаңа стандарттарда дәстүрлі құндылықтар мен отансүйгіштік тәрбиені күшейту шаралары да қарастырылған.