Қазақстан құрамасы Намибияны қабылдап, сенімді жеңіске жетті

Астанада өткен FIFA Series 2026 турнирі аясында Қазақстан ұлттық құрамасы өз алаңында Солтүстік Африканың Намибия құрамасын қабылдады.

Ойынның алғашқы минуттарынан-ақ алаң иелері бастаманы өз қолына алып, шабуылға басымдық берді. Дегенмен Намибия құрамасы да оңайлықпен берілмей, қарымды қарсылық көрсетті. 10-шы минутта қарсыластардың қауіпті шабуылын қақпашы Темірлан Анарбеков сәтті қайтарып, командасын голдан құтқарып қалды.

Осы сәттен кейін Қазақстан құрамасы қарқынын үдете түсті. Нәтижесінде, 12-ші минутта Вороговский есеп ашып, алаң иелерін алға шығарды.

Екінші таймда да ойын жоғары қарқында жалғасын тапты. 79-шы минутта Әлібек Қасым есепті еселеп, матчтың нүктесін қойды.
Ойын алдындағы баспасөз мәслихатында ұлттық құраманың бас бапкері Талғат Байсуфинов шақырту алған ойыншылардың деңгейі жоғары екенін атап өтіп, бастапқы құрам іріктеу арқылы жасақталатынын айтқан еді.

Матчтан кейінгі пікірінде бас бапкер жеңіске қарамастан, командада әлі де талдауды қажет ететін қателіктер бар екенін жеткізді:

«Жеңіске жеткенімізбен, жіберілген қателіктерді сараптаймыз. Алда маңызды ойындар бар. Жігіттерді демалдырып, 28 наурыз күні өтетін Намибия мен Комор аралдары арасындағы матчты бақылап, 31 наурыздағы Қазақстан – Комор аралдары ойынына тыңғылықты дайындаламыз. Бұл – тек бастамасы. Алда әлі көптеген жоспарлар бар, құрам да өзгеруі мүмкін», – деді ол.

Намибия құрамасының бас бапкері Коллин Бенжамин өз кезегінде Қазақстан құрамасының ойынына жоғары баға берді:

«Қазақстан құрамасы бүгін өте сауатты тактика көрсетіп, әр мүмкіндікті тиімді пайдаланды. Бұл ойын біз үшін үлкен тәжірибе болды. Алдағы уақытта жаттығу процесін күшейтеміз. Ойыншыларыма ризамын. Сонымен қатар, қазақ футболшыларының физикалық және атлетикалық дайындығы жоғары деңгейде. Қазақ халқының қонақжайлығына да ерекше алғыс білдіремін», – деді маман.

Нуризат Муратбекқызы