Қазақстан құрамасы FIFA Series турнирін жеңіспен қорытындылады

31 наурыз күні Қазақстанда өткен FIFA Series турнирі өз мәресіне жетті. Турнирдің қорытынды ойынында Қазақстан ұлттық құрамасы Камор аралдарына қарсы алаңға шықты.

Ойын Қазақстан құрамасының белсенді шабуылдарымен басталды. Алғашқы минуттардан-ақ жоғары қарқын көрсеткен жерлестеріміз қарсылас қақпасына қауіп төндіріп, нәтижесінде 4-минутта Рамазан Оразов есеп ашты. Ерте соғылған гол ойынның жалпы ырғағына әсер етіп, ұлттық құрама шабуылды үдете түсті. Дегенмен кездесуде басқа гол тіркелмей, матч 1:0 есебімен аяқталды.

Кездесуден кейін Камор аралдары құрамасының бас бапкері Юбер Велюд Қазақстан құрамасының тәжірибелі ойыншылардан жасақталғанын атап өтті. Сонымен қатар ол қазақ халқының қонақжайлығына алғысын білдіріп, командаға барлық жағдай жасалғанын жеткізді. Өз сөзінде қарсылас бапкері негізгі шабуылшыларының келмеуі ойынға әсер еткенін де жасырмады.

«Бұл біз үшін үлкен тәжірибе болды», – деп қорытындылады ол.

Ал Қазақстан құрамасының бас бапкері Талғат Байсуфинов өз сөзін жанкүйерлерге алғыс айтудан бастады. Ол бұл жеңісті ортақ жетістік деп атап, жолдастық кездесулердің жоғары деңгейде өтуі команда үшін маңызды тәжірибе болғанын айтты. Бапкер алдағы уақытта ойындарға жан-жақты талдау жасалып, қателіктермен жұмыс жүргізілетінін жеткізді.

Сонымен қатар ол күзде өтетін Ұлттар лигасына дайындық барысында бұл матчтардың үлкен рөл атқаратынын атап өтті. Құрама сапына Дастан Сәтпаев пен Абат Аймбетов сынды ойыншылардың жақсы дайындықпен қосылатынын айтып, барлық футболшы ұлттық құрамаға шақырту алу үшін әрдайым жоғары деңгейде дайын болуы керектігін ескертті.

Осылайша, бірнеше күнге созылған FIFA Series турнирі аясында Астанада өткен ойындарда Қазақстан ұлттық құрамасы екі кездесуде де жеңіске жетіп, жарысты сәтті аяқтады.

Қай ойын болмасын, ұлттық құрама үшін бұл — жаңа деңгей мен маңызды тәжірибе. Алдағы кездесулерде де сәттілік тілейміз!

Ұлттық құрамамен бірге жанкүйер болайық!