Қазақстан кәсіпқой бокс федерациясы Әлімханұлының допинг дауына қатысты мәлімдеме жасады

Кәсіпқой боксшы Жәнібек Әлімханұлының ісін алғашқы қарау нәтижесі бойынша бұл жағдай қосымша медициналық, сараптамалық және құқықтық бағалауды қажет ететіні белгілі болды. Бұл туралы Қазақстан кәсіпқой бокс федерациясының президенті Рақымжан Ерденбеков мәлімдеді.

«Қоғамда кәсіпқой боксшы Жәнібек Әлімханұлының допинг-сынамаларының оң нәтижесі мен осы іске қатысты тыңдаулардың талқылануына байланысты түсініктеме беруді жөн көрдім. Қазақстан кәсіпқой бокс федерациясының Тәртіптік комиссиясы алғашқы тыңдауды өткізді. Оның мақсаты асығыс қорытынды жасау емес, материалдар мен процедураларға бастапқы баға беру болды. Осы кезеңнің өзінде істің үстірт қаралмайтыны және қосымша медициналық, сараптамалық әрі құқықтық бағалауды қажет ететіні анықталды», — деп жазды ол өзінің Instagram парақшасында.

Ерденбековтің айтуынша, осыған байланысты 23 қаңтарға қайта тыңдау тағайындау туралы шешім қабылданған. Ол бұл қадамның күрделі допинг істеріндегі халықаралық стандартты тәжірибе екенін атап өтті.

«Баса айтамын: допинг-сынаманың оң нәтижесі спортшының қасақана әрекетін немесе елеулі кінәсін өздігінен дәлелдей алмайды. Комиссия істі халықаралық спорттық құқықта танылған "No Significant Fault or Negligence" (Елеулі кінәнің немесе салғырттықтың болмауы) принципін ескере отырып қарастыруда. Барлық процедуралар аяқталмайынша, комиссия түпкілікті қорытынды жасаудан тартынады. Шешімдер тек фактілер негізінде, әділдік пен халықаралық стандарттарды сақтай отырып қабылданады», — деп түйіндеді Ерденбеков.