Қазақстан Қашаған операторының мүлкін бұғаттап тастады

Атырау облысының Экология департаменті Қашаған кен орнын игеретін North Caspian Operating Company филиалынан 2 трлн 356 млрд теңгеден астам экологиялық айыппұлды өндіру жөнінде атқарушылық құжат берді. Соның аясында компанияның мүлкі мен көлігіне тыйым салынды.

Әділет министрлігінің атқарушылық іс жүргізу органдарының ақпараттық жүйесінде жарияланған құжатқа сәйкес, NCOC филиалының берешегі 2 трлн 356 млрд 293 млн 268 мың 36 теңге. Атқарушылық құжат 21 шілдеде берілген.

Қазақстан билігі NCOC-қа қатысты экологиялық айыппұлды 2023 жылы салған. Компанияға Қашаған кен орнында күкіртті шамадан тыс көп сақтады, су тазарту және шығарындыларға байланысты талаптарды бұзды деген уәж айтылды. NCOC бұл шешімге келіспей, сотқа жүгінді.

Биыл 19 маусымда Атырау облыстық соты Экология департаменті салған айыппұлды күшінде қалдырды. Оны ерікті түрде төлеу мерзімі 20 шілдеде аяқталған. Әділет министрлігі бұған дейін мерзім өткен жағдайда мәжбүрлеп өндіру шаралары қолданылып, өндірілетін соманың 10%-ы көлемінде қосымша атқарушылық санкция салынуы мүмкін екенін хабарлаған.

NCOC бұған дейін халықаралық төрелік сот Қазақстанға дау аяқталғанға дейін айыппұлды мәжбүрлеп өндіруге тыйым салғанын мәлімдеген. Алайда Әділет министрлігі шетелдік төреліктің қамтамасыз ету шарасы Қазақстан заңнамасының міндетті талаптарынан жоғары тұрмайтынын және күшіне енген сот шешімін орындауға кедергі келтірмейтінін айтқан.

Қашаған операторлары биыл ақпанда экологиялық айыппұлға қатысты халықаралық төрелік ісін бастаған. Компания өзінің күкіртті өңдеу қызметі заң талаптарына толық сай екенін айтып, құқықтарын қорғаудың барлық қолжетімді тетігін пайдаланатынын мәлімдеген.