Қазақстан интернет еркіндігі бойынша Орталық Азия елдерінен төмен балл алды

Cloudwards жобасының сарапшылары әлем елдеріндегі интернет еркіндігінің деңгейіне талдау жасап, жаңартылған рейтингті жариялады. Зерттеу нәтижесі бойынша Қазақстан Орталық Азия өңіріндегі ең төменгі көрсеткіштердің бірін көрсетті.

Сарапшылар рейтингті түзу барысында төрт негізгі критерийге сүйенген: торренттердің қолжетімділігі, ересектерге арналған контенті бар сайттарға кіру мүмкіндігі, әлеуметтік желілерде өз пікірін еркін білдіру құқығы және VPN сервистеріне салынған шектеулердің болуы. Елдер 0-ден 100-ге дейінгі шкала бойынша бағаланды (балл неғұрлым жоғары болса, еркіндік деңгейі соғұрлым жоғары).

Өңір елдері арасында Қазақстан мен Өзбекстан ең нашар көрсеткіштерге ие болып, тиісінше 36 және 24 балл жинады. Салыстырмалы түрде алсақ, Тәжікстан 56 баллмен аймақта көш бастаса, Қырғызстан 52 баллға ие болды. Түркменстан 16 баллмен өңірдегі ең соңғы орында тұр.

Рейтингтің жоғарғы сатысына бірден 11 мемлекет жайғасты (92 балл). Олардың қатарында Еуропаның Бельгия, Дания, Финляндия, Исландия, Лихтенштейн, Норвегия және Словакия елдері бар. Сондай-ақ үздіктер тізіміне Жаңа Зеландия, Коста-Рика, Суринам және Шығыс Тимор енді.

Ең төменгі көрсеткіштер:

• Солтүстік Корея: 0 балл (әлемдегі ең жабық интернет);

• Ресей, Иран және Қытай: бар болғаны 4 балл. Бұл елдерде X (Twitter), Facebook және YouTube секілді ірі платформалар мен веб-ресурстарды бұғаттау жүйелі түрде қолданылады.

Мамандардың пікірінше, Қазақстанның төмен балл алуына интернеттің қолжетімділігі емес, көбіне ақпараттық ресурстар мен сервистерге қойылатын шектеулер әсер еткен.