Қазақстан гүлді қай елдерден алады?

Қазақстан 2025 жылы шетелден 77,6 млн АҚШ долларына 10 954 тонна гүл мен гүл бүршігін импорттаған. Бұл туралы Қазақстан Республикасының Ұлттық статистика бюросы мәлім етті.

Мәліметке сәйкес, 2024 жылмен салыстырғанда импорт көлемі 1,4 мың тоннаға азайған.

Қазақстанға гүл жеткізетін негізгі ел – Эквадор. Жалпы импорт көлемінің 41,9 пайызы немесе 4 586 тоннасы осы мемлекетке тиесілі.

Сондай-ақ гүлдер ірі көлемде Қытай (2 678 тонна), Нидерланд (1 702 тонна), Колумбия (778 тонна) және Кения (739 тонна) елдерінен жеткізілген.

Жалпы өткен жылы Қазақстанға әлемнің 45 елінен гүл импортталған. Елге негізінен раушан гүлдері әкелінген. Олардың көлемі 6 219 тоннаны құрады.