Қазақстан етін енді мұхиттың арғы беті де жейді: Жаңа нарықтар тізімі белгілі болды

Биыл Қазақстаннан ет өнімдерін сатып алатын елдердің саны артады. Бұл туралы Сенатта өткен мал шаруашылығын дамыту мәселелеріне арналған отырыста ҚР Ауыл шаруашылығы вице-министрі Аманғали Бердалин мәлімдеді.

Вице-министрдің айтуынша, 2025 жылы 16 ветеринарлық сертификат келісіліп, қол қойылған. Бұл құжаттар отандық өнімдерді мына елдерге экспорттауға жол ашады:

• Еуропалық Одақ елдері және Ұлыбритания;
• Ирак және Иран;
• АҚШ және Канада;
• Вьетнам мен Парсы шығанағы елдері.

Министрлік алдағы уақытта экспорттық тауарлар тізімін кеңейтуді көздеп отыр:

• Қытайға: құс еті, ірі қара және қой еті (салқындатылған), сондай-ақ шошқа етінің қосалқы өнімдері;
• Еуропалық Одаққа: жылқы еті және акваөсіру өнімдері;
• Пәкістанға: ірі қара және ұсақ мал, құс еті және басқа да өнімдер.

Қазақстанда мал шаруашылығын дамытудың 2026-2030 жылдарға арналған кешенді жоспарының жобасы мақұлданды. Бұл бағдарлама саланың алдағы бес жылдық даму бағытын айқындамақ.