Қазақстан ЕАЭО елдері арасында азық-түлік бағасының өсуін ең төмен деңгейде ұстап отыр

Еуразиялық экономикалық комиссияның деректеріне сүйенсек, Қазақстан азық-түлік бағасының өсу қарқыны бойынша ЕАЭО елдері арасында ең төменгі көрсеткішке ие. Биылғы қыркүйек айында еліміздегі жылдық инфляция 8,3%-ға дейін төмендесе, азық-түлік бағасының өсу қарқыны 5,1%-ға дейін баяулады. Бұл туралы Сауда және интеграция министрлігі хабарлады.

Бағаны тұрақтандыру және әлеуметтік маңызы бар азық-түлік тауарларының қолжетімділігін қамтамасыз ету мақсатында Сауда және интеграция министрлігі түрлі шараларды қолға алуда. Оның ішінде сауда үстемесін бақылау, отандық өндірісті қолдау, маусымаралық кезеңде тауар интервенциялары және делдалдарды болдырмау үшін баға тізбегін талдау бар. Жыл басынан бері осы бағыттағы шаралардың нәтижесінде 667 айыппұл салынды және сауда үстемесін асыра қолданған 3 мыңнан астам бұзушылық анықталды.

Сонымен қатар жұмыртқа бағасын тұрақты ұстау үшін жұмыртқа өндірушілермен бірге жылдың соңына дейін баға шегін бекіту туралы келісім жасалды. Ал отандық өнім үлесін арттыру мақсатында сауда желілерімен бірлескен меморандумға қол қойылды.