Қазақстан бойынша кейбір көшелер уақытша жабылуы мүмкін: ҰҚК ресми мәлімдеме жасады

Осы жылдың 5-30 маусым аралығында Қазақстан Республикасында «Найза-Антитеррор-2026» жоспарлы антитеррористік оқу-жаттығулары өткізілуде. Бұл туралы Қазақстан Республикасы Ұлттық қауіпсіздік комитетінің Антитеррористік орталығы штабы хабарлады.

Ауқымды іс-шараның өткізілуіне байланысты елдің кейбір аймақтары мен жекелеген аудандарында автокөлік құралдарының қозғалысына уақытша шектеулер енгізілуі мүмкін. Осыған орай, Ұлттық қауіпсіздік комитеті ел тұрғындары мен қонақтарынан жүргізіліп жатқан іс-шараларға түсіністікпен қарауды, бекітілген қауіпсіздік шараларын қатаң сақтауды және мемлекеттік органдар қызметкерлерінің заңды талаптарын бұлжытпай орындауды сұрайды.

Сонымен қатар құзырлы орган өкілдері азаматтарды дүрбелеңге бой алдырмай, тек ресми ақпарат көздеріне ғана сенуге және әлеуметтік желілер мен мессенджерлерде шындыққа жанаспайтын жалған хабарламаларды таратпауға шақырады.

Қазіргі уақытта оқу-жаттығу шаралары жоспарланған кестеге сәйкес жүзеге асырылуда.