Қазақстан «1 млрд доллар» төлемей Бейбітшілік кеңесіне қалай қосылды?

Қазақстан Бейбітшілік кеңесінің құрамына ешқандай қаржылық жарна төлемей енді. Бұл жөнінде Ақорданың баспасөз қызметі ресми мәлімдеді.

Ресми ақпаратқа сәйкес, Кеңес Жарғысында көрсетілген 1 млрд АҚШ доллары көлеміндегі ерікті жарна мүшелікке қабылданудың міндетті шарты емес. Мұндай төлем жасау немесе жасамау әр мемлекеттің дербес шешіміне байланысты.

Ақорданың түсіндіруінше, егер ел аталған жарнаны алғашқы бір жыл ішінде аударса, онда оның Кеңестегі мүшелігін белгіленген үш жылдық мерзімнен кейін ұзарту мүмкіндігі қарастырылады. Алайда жарна төлемеу Кеңеске кіруге кедергі болмайды.

«Бейбітшілік кеңесіне мүшелік үшін мемлекеттің егемен шешімі жеткілікті. Кеңеске қабылданған сәттен бастап мүшелік мерзім үш жылды құрайды», – делінген ресми хабарламада.

Осылайша, Қазақстан Кеңеске Жарғы талаптарын сақтай отырып, қосымша қаржылық міндеттемелерсіз қосылғаны атап өтілді.