Қазақстан азаматы Ресей тыңшысы ма: Министрлік Германияға ресми сауал жолдады

Қазақстан Сыртқы істер министрлігі Берлинде тыңшылық күдігімен ұсталған Қазақстан азаматына қатысты Германияның құзырлы органдарына ресми сұрау жолдады.

DW басылымының мәліметінше, Берлинде қылмыстық полиция Қазақстан азаматын Ресейдің арнайы қызметтеріне ақпарат берген деген күдікпен ұстаған. Тергеу аясында күдіктінің және тағы бір адамның үйінде тінту жүргізілген.

Сот санкциясында көрсетілген дерекке сәйкес, ол 2025 жылдың мамыр айынан бастап Германияда жүріп, Ресейдің арнайы қызметтерінің бірімен тұрақты байланыста болған және түрлі ақпараттарды беріп отырған. Атап айтқанда, Германияның Украинаға әскери қолдауы, қорғаныс өнеркәсібі, соның ішінде дрондар мен робот техникасын әзірлейтін кәсіпорындар туралы мәліметтер берілгені айтылады.

Сонымен қатар ол Берлиндегі қоғамдық ғимараттар мен автобандардағы әскери колонналарды, оның ішінде НАТО елдерінің техникасын суретке түсіріп, диверсия жасауға қолайлы нысандар туралы ақпарат ұсынған деген күдік бар. Алайда Der Spiegel басылымы қауіпсіздік қызметтеріндегі дереккөздерге сілтеме жасап, күдіктінің нақты әрекеттен гөрі идея ұсынумен шектелуі мүмкін екенін жазады.

Күдіктіге қатысты бұлтартпау шарасы 29 сәуірде Федералдық сот палатасында қаралады. Қазақстан СІМ қазіргі уақытта Германиядан жауап күтіп отырғанын және мәселе ведомство бақылауында екенін мәлімдеді.