Қазақстан армиясы заманауи соғыс талаптарына сай дайындықты бастады

Қазақстан Қарулы Күштерінің жаяу әскер бөлімшелерінде тактикалық-оттық дайындық курстары жаңа ережелер бойынша оқытыла бастады. Енді сарбаздар бір орында тұрып емес, қозғалыс үстінде нысананы көздеуді үйренеді. Бұл туралы ҚР Қорғаныс министрлігінің баспасөз қызметі хабарлады.

Министрлік өкілдерінің айтуынша, қазіргі заманғы әскери қақтығыстар классикалық дайындық әдістерін қайта қарауды талап етіп отыр.

«Заманауи қарулы қақтығыстар тәжірибесі көрсеткендей, статикалық қалыпта ату жаттығулары өз маңызын жойып, оның орнына күрделі әрі динамикалық оқыту формалары келуде. Қазір басты назар қозғалыс кезінде оқ жаудыру, бөлімше құрамында өзара іс-қимыл жасау, жедел шешім қабылдау және тез өзгеретін жағдайға бейімделу дағдыларына аударылады», - делінген хабарламада.

Әскерге жаңа стандарттарды енгізу үшін арнайы нұсқаушылар корпусықұрылды. Бұл мамандар әскери қызметшілерге тек мергендікті ғана емес, сонымен қатар:

• Бөлімше ішіндегі үйлесімді іс-қимылды;

• Қарусыз қалған жағдайда тығырықтан шығу жолдарын;

• Шайқас кезіндегі жедел тактикалық шешімдерді үйретеді.

Қазіргі уақытта нұсқаушылар өз жұмысына кірісіп кетті.

Бұл әскери реформа Таяу Шығыстағы жағдай ушығып тұрған тұста жүзеге асырылуда. Еске сала кетейік, бұған дейін ҚР Сыртқы істер министрлігі Қазақстанның аймақтағы қақтығысқа қатысты ресми ұстанымын жариялаған болатын: республика Иран, АҚШ және Израиль арасындағы әскери іс-қимылдарға қатысты бейтараптық саясатын ұстанады.