Қазақстан әлемдегі ең қуатты армиялардың топ-60 тізіміне енді

Қазақстан әлемнің 145 елі қатысқан Global Firepower жыл сайынғы әскери қуат рейтингінде 58-орынды иеленді. Республика Орталық Азия өңірінде әскери әлеуеті бойынша көшбасшылық орнын сақтап қана қоймай, қорғаныс шығындарының көлемі жағынан да алдыңғы қатарға шықты.

2026 жылғы есеп бойынша Қазақстанның әскери қуат индексі (PwrIndx) 1.0433 деңгейінде бағаланды. Айта кетейік, бұл рейтингте көрсеткіш нөлге неғұрлым жақын болса, мемлекеттің әскери әлеуеті соғұрлым жоғары деп есептеледі.

Зерттеу нәтижелері Қазақстанның қорғаныс саласына бөлетін қаржысы көршілес мемлекеттерден айтарлықтай жоғары екенін көрсетті. Еліміздің әскери бюджеті 5,836 млрд долларды құрады. Бұл көрсеткішті халық санына шаққанда, жан басына шаққандағы шығын жылына 284 доллардан келеді. Салыстырмалы түрде:

• Түркіменстан: 209 доллар;

• Өзбекстан: 162 доллар;

• Қырғызстан: 88 доллар;

• Тәжікстан: 42 доллар.

Инфографика Kazinform

Жаһандық тізімде АҚШ (0.0741), Ресей (0.0791) және Қытай (0.0919) мемлекеттері үздік үштікті түйіндеп тұр. Сондай-ақ алғашқы ондыққа Үндістан, Оңтүстік Корея, Франция, Жапония, Түркия, Италия және Бразилия енді. Ал рейтингтің соңғы сатыларында Бутан және Белиз сияқты елдер орналасқан.

Global Firepower сарапшылары бағалау барысында 60-тан астам факторды ескереді. Олардың қатарында әскер саны, қаржылық мүмкіндіктер, логистика, географиялық орналасу, техникалық жарақтандыру және экономиканың тұрақтылығы бар.

Бұған дейін Қазақстанда Қарулы Күштердің әскери қызметшілеріне ақшалай үлес пен жәрдемақы төлеудің жаңа ережелері бекітілген болатын, бұл мемлекеттің қорғаныс саласындағы әлеуметтік саясатын нығайтуға бағытталған қадам болып табылады.